Disa drejtues mjetesh janë ndaluar nga policia, pasi kryenin manovra të rrezikshme në zonën e “Bulevardit të Ri”, në Tiranë. Sipas autoriteteve të policisë, të rinjtë e apasionuar pas shpejtësisë, filmonin momentet e thyerjes së rregullave të qarkullimit rrugor dhe i postonin në rrjetin social TikTok.
Vetëm në 24 orët e fundit, policia Rrugore e Tiranës konstatoi 6 të rinj, të cilët janë ndaluar nga efektivët, pasi kanë kryer manovra të rrezikshme duke rrezikuar jetën e tyre dhe përdoruesve të tjerë në rrugë.
Efektivët teksa monitoronin platformën sociale, Tik-Tok, i kanë evidentuar dhe kanë ndërhyrë menjëherë, pasi të rinjtë garat me automjete i postonin në rrjetin social, duke i gjobitur më pas me 40 mijë lekë, referuar ligjit numër 8378 datë 22.07.1998 “Kodi Rrugor i Republikës së Shqipërisë i ndryshuar; neni 139 paragrafi 3.
Policia Rrugore e Tiranës apelon për të gjithë përdoruesit e rrugës, që të respektojnë me rigorozitet rregullat e qarkullimit rrugor dhe fton qytetarët që të denoncojnë në numrin pa pagesë 112, çdo shkelje të rregullave të qarkullimit rrugor.
p.k\dita
