Nga Dori Xhima
Historia e Robert Wadlow (i njohur gjithashtu si “Gjiganti i Altonit”) është sa e jashtëzakonshme, aq edhe prekëse. Ai mbetet njeriu më i gjatë në historinë e dokumentuar të njerëzimit, për të cilin ekzistojnë prova të pakundërshtueshme mjekësore.
Robert Pershing Wadlow lindi më 22 shkurt 1918 në Alton, Illinois (SHBA). Kur lindi, peshonte rreth 3.85 kg dhe dukej si një foshnjë krejtësisht e zakonshme.
Mirëpo, shumë shpejt trupi i tij filloi të rritej me një ritëm jashtëzakonisht të shpejtë. Në moshën 1-vjeçare ishte 100 cm i gjatë dhe peshonte 20 kg. Në moshën 5-vjeçare mbante veshje të destinuara për të rritur. Në moshën 8-vjeçare kaloi gjatësinë e babait të tij, duke arritur në 188 cm. Në moshën 13-vjeçare u bë “skauti më i gjatë në botë” me 224 cm gjatësi.
Rritja e tij e pakontrolluar shkaktohej nga hiperplazia e gjëndrës hipofizë (hiperpituitarizmi). Kjo bënte që trupi i tij të prodhonte sasi jonormale të hormonit të rritjes (STH). Në atë kohë, mjekësia nuk kishte ende trajtimet apo ndërhyrjet kirurgjikale që ekzistojnë sot për të frenuar këtë proces.
Pavarësisht përmasave të tij gjigante, Roberti njihej nga të gjithë për natyrën e tij të qetë, të butë dhe me edukatë të lartë, për këtë arsye u mbiquajt gjithashtu “Gjiganti i Butë” (The Gentle Giant).
Në vitin 1936, pasi përfundoi shkollën e mesme, ai u bë i famshëm në të gjithë Amerikën duke u bërë pjesë e cirkut Ringling Brothers. Më vonë, ai bëri një turne promovues për një kompani këpucësh (International Shoe Company), e cila në këmbim i siguronte këpucët e tij të bëra me porosi pa pagesë, një lehtësi e madhe, duke parasysh se këmbët e tij kërkonin numrin 75 (rreth 47 cm gjatësi shputë).
Sfidat shëndetësore dhe vdekja e parakohshme
Gjatësia dhe pesha e madhe (peshonte rreth 220 kg në kulmin e tij) i shkaktonin mundime të mëdha fizike. Ai nuk kishte ndjeshmëri të plotë te këmbët dhe shputat, ndaj i duhej të përdorte ortoza (aparatet mbështetëse) në këmbë për të ecur, ndonëse refuzonte të përdorte karrigen me rrota.
Pikërisht një nga këto aparate mbështetëse i shkaktoi tragjedinë. Në korrik të vitit 1940, gjatë një parade në Michigan, një ortozë i fërkoi keq kyçin e këmbës, duke i krijuar një mefshje (flluskë) që u infektua rëndë.
Për shkak të sistemit të tij imunitar të dobësuar dhe mungesës së antibiotikëve modernë në atë kohë, infeksioni u përkeqësua shpejt. Më 15 korrik 1940, në moshën vetëm 22-vjeçare, Robert Wadlow ndërroi jetë në gjumë.
18 ditë përpara se të ndërronte jetë, mjekët matën gjatësinë e tij përfundimtare: 272 cm (8 këmbë e 11.1 inç). Rritja e tij nuk kishte ndaluar deri në ditën e fundit të jetës.
Në funeralin e tij morën pjesë mbi 40,000 njerëz. Arkivoli i tij ishte 3.28 metra i gjatë dhe u deshën 12 burra për ta bartur. Sot, në qytetin e tij të lindjes, Alton, qëndron një shtatore me madhësi natyrale në nderim të jetës së tij.
DITA
