Humbasin jetën 136 persona nga kolera në Haiti

Numri i të vdekurve nga kolera në Haiti ka shkuar në 136 dhe gjendja po përkeqësohet çdo ditë. Sipas Ministrisë së Shëndetësisë në Haiti, tetëdhjetë e nëntë nga personat që u infektuan vdiqën në spital ose në qendrat e trajtimit të kolerës, ndërsa 47 prej tyre vdiqën në shtëpi, raporton CNN.

Qeveria haitiane po punon me organizatat ndërkombëtare shëndetësore për t’iu përgjigjur krizës, por ata thonë se kanë kapacitet të kufizuar, me rreth 350 shtretër në qendrat e trajtimit të kolerës. Njerëzit që jetojnë në zona me mungesë të ujit të sigurt për pije, ose kanalizimeve të pamjaftueshme, janë të cenueshëm ndaj kolerës, e cila mund të rezultojë nga konsumimi i ushqimit ose ujit të kontaminuar nga bakteret.

Edhe pse ekzistojnë vaksina dhe simptomat mund të “trajtohen lehtësisht”, sipas Organizatës Botërore të Shëndetësisë, kolera mbetet një vrasës tinëzar përmes dehidrimit. Vetëm një muaj më parë, Ministria e Shëndetësisë në Haiti kishte dokumentuar vetëm tetë vdekje nga kolera, të gjitha në kryeqytetin me popullsi të dendur Port-au-Prince.

Deri në këtë vit, sëmundja dukej se ishte larguar kryesisht nga vendi, pas një përpjekjeje mbarëkombëtare të shëndetit publik. Përhapja e fundit filloi në vitin 2010, kur kolera u përhap nga një kamp paqeruajtësish të Kombeve të Bashkuara në popullatë.

Ai shpërthim përfundimisht arriti në 800,000 raste dhe mori të paktën 10,000 jetë. Megjithëse OKB-ja e ka pranuar përfshirjen e saj në shpërthim, ajo nuk ka pranuar përgjegjësinë ligjore. Organizatat për të drejtat e njeriut nuk kanë reshtur së kërkuari kompensim financiar për viktimat.

a.m/dita