Forcat Mbrojtëse të Izraelit (IDF) kanë konfirmuar se nga Jemeni është lëshuar një raketë drejt jugut të Izraelit. Kjo përbën sulmin e parë të drejtpërdrejtë nga Huthit jemenas, të mbështetur nga Irani, që nga fillimi i operacionit “Roaring Lion” një muaj më parë (28 shkurt).
Sulmi aktivizoi sirenat në të gjithë Beershebën dhe vendbanimet përreth në shkretëtirën Negev, ndërsa ushtria izraelite pretendon se sistemet e mbrojtjes ajrore reaguan me sukses për të neutralizuar kërcënimin. Banorëve fillimisht iu kërkua të ndjekin udhëzimet e Komandës së Frontit të Brendshëm, por IDF më pak se 15 minuta më vonë njoftoi se ishte e sigurt të dilnin nga strehimoret në të gjithë vendin. Sipas informacioneve të para, nuk ka raportime për viktima apo goditje direkte.
Ky sulm me raketë vjen menjëherë pasi një zëdhënës i Huthive paralajmëroi hyrjen në luftë në Lindjen e Mesme nëse vazhdojnë sulmet ndaj Iranit.
Në një deklaratë të publikuar në Telegram, Yahya Saree, zëdhënës i forcave të armatosura jemenase (fraksioni ushtarak i Huthive), theksoi se gishtat e tyre janë në këmbëz për ndërhyrje të drejtpërdrejtë ushtarake nëse plotësohet ndonjë nga kushtet e mëposhtme: nëse ndonjë shtet tjetër i bashkohet SHBA-së dhe Izraelit kundër Iranit; nëse Deti i Kuq përdoret “për operacione armiqësore të Amerikës dhe Izraelit kundër Republikës Islamike të Iranit dhe çdo vendi mysliman”; si dhe në rast të “vazhdimit të përshkallëzimit” kundër Iranit.
Huthit, të cilët e konsiderojnë veten pjesë të “boshtit të rezistencës” të udhëhequr nga Irani, më herët kanë kërcënuar me sulme të koordinuara së bashku me grupe të tjera pro-iraniane si Hamasi dhe Hezbollahu libanez. Megjithëse Huthit deri tani kanë shmangur përfshirjen direkte në këtë konflikt konkret, një nga liderët e tyre anonim deklaroi dje se grupi është i gatshëm të mbështesë përpjekjet luftarake të Teheranit.
“Jemi plotësisht të gatshëm ushtarakisht me të gjitha opsionet. Sa i përket përcaktimit të ‘orës zero’, kjo i lihet udhëheqjes. Po ndjekim zhvillimet dhe do ta dimë kur është momenti i duhur për të vepruar”, tha lideri i Huthive, duke shtuar se Irani për momentin “po e mposht armikun”, por ata janë të gatshëm të reagojnë nëse situata ndryshon.
Sulmi i së shtunës mund të sinjalizojë hapjen e një fronti krejtësisht të ri, duke nxitur frikë për thellimin e krizës globale ekonomike dhe të naftës. Gjatë konflikteve të mëparshme në Gazë, Huthit kanë sulmuar rregullisht anije tregtare në Detin e Kuq, duke shkaktuar krizë globale në transportin detar dhe tregti.
j.l./ dita
