Gjykata e Apelit të Posaçëm ka bërë me dije ditën e djeshme se ka rrëzuar kërkesën e ishdrejtorit të TVSH-së, Thoma Gëllçi për pafajësi.
Togat e zeza të Apelit kanë lënë në fuqi vendimin e Shkallës së Parë, duke e dënuar me vendim të formës së prerë me 1.4 vjet burg ish-drejtuesin. Ai u shpall fajtor për akuzën e “Shpërdorimit të detyrës” në lidhje me tenderin për blerjen e pajisjeve për kanalin “RTSH Agro”.
Gjithashtu, në fuqi u la vendimi edhe për tre personat e tjerë të vënë nën akuzë për të njëjtën çështje dhe të hetuar në të njëjtën dosje. Sipas Prokurorisë së Posaçme, Gëllçi në cilësinë e drejtuesit dhe 3 zyrtarët e tjerë pjesë e komisioneve përzgjedhëse kanë favorizuar kompaninë fituese nëpërmjet kritereve të vendosura. Gëllçi së bashku me Julian Tapia, Alban Malaveci dhe Ervin Muraj u arrestuan në tetor të vitit 2021.
Në gusht të këtij viti, ish-drejtori la qelitë për shkak të përfundimit të dënimit. Pas arrestimit në atë kohë përmes një njoftimi zyrtar, Prokuroria bëri të ditur se ish-zyrtari i lartë i Televizionit Publik, i cili financohet nga buxheti i shtetit, akuzohet për shkeljet e konstatuara në procedurën e hapur të prokurimit me objekt blerje pajisjesh për kanalin “RTSH Agro”, me fond rreth 1 milion dollarë të zhvilluar në datën 9 nëntor 2018. Për të njëjtën çështje, në pranga kanë rënë edhe tre punonjësit e RTSH-së.
Vendimi i Apelit
“Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët Igerta Hysi (kryesuese), Dhimitër Lara (anëtar) dhe Iliriana Olldashi (anëtare), më datë 7.12.2022, përfundoi shqyrtimin e çështjes së regjistruar me nr. 66 akti, datë 4.10.2022, mbi ankimin e paraqitur nga ankuesit/të pandehurit Th.G., J.T., E.M., A.M., etj., kundër vendimit nr. 37, datë 2.6.2022 të Gjykatës së Posaçme të Shkallës së Parë për Korrupsionin dhe Krimin e Organizuar që ka vendosur:
“Deklarimin fajtor të të pandehurit Th.G., për kryerjen e veprës penale ‘Shpërdorimi i detyrës’ e parashikuar nga neni 248 i Kodit Penal dhe në bazë të kësaj dispozite dënimin e tij me 2 (dy) vite burgim. Në aplikim të nenit 406/1 të Kodit të Procedurës Penale masës së mësipërme të dënimit i zbritet 1/ 3, duke u dënuar përfundimisht i pandehuri Th.G. me 1 (një) vit dhe 4 (katër) muaj burgim. Vuajtja e dënimit për të pandehurin Th.G. do të fillojë nga dita që ndaj tij është zbatuar masa e sigurimit ‘Arrest në burg’ dt. 8.10.2021 dhe do të kryhet në një IEVP, burg i sigurisë së zakonshme. Në zbatim të nenit 35 të Kodit Penal heqjen e të drejtës për të pandehurin Th.G. për të ushtruar funksione publike për një afat kohor 5 (pesë) vjeçar”, u tha në njoftimin zyrtar të vetë Gjykatës. Në fakt, prej shumë kohësh, ish-kreu i RTSH-së ka tentuar të ndryshojë edhe masat e sigurisë siç tentoi të ndryshonte edhe masën e dënimit duke synuar pafajësinë, duke provuar shkallët e ndryshme të gjyqësorit, por asnjëra prej tyre nuk hoqi dorë nga vendimet e para.
j.l./ dita
