TIRANË- Një 60-vjeçar, i dënuar me 12 vjet burg, është ekstraduar nga SHBA në Shqipëri. Sipas policisë, ky person është dënuar nga gjykata e apelit, për veprën penale “Trafikimi i narkotikëve”, mbetur në tentativë, kryer në bashkëpunim.
Gjatë periudhës 2014-2015, 60-vjeçari, në rolin e organizatorit dhe financuesit, në bashkëpunim me shtetas të tjerë, ka organizuar trafikimin dhe transportimin e lëndëve narkotike kokainë dhe heroinë, nga Turqia drejt Shqipërisë, me itinerar Turqi-Greqi-Maqedoni-Shqipëri, për t’i shitur këto lëndë në tregun e brendshëm. Më pas ai synonte të trafikonte sasinë e drogës drejt vendeve të tjera të BE-së.
Njoftimi i Policisë:
Në kuadër të operacionit të koduar “Return”, ekstradohet në Shqipëri, shtetasi Albert Shkëmbi, i dënuar me 12 vjet burgim, për veprimtari kriminale në fushën e narkotikëve.
Lokalizimi dhe kapja e këtij shtetasi, në New Jersey, në muajin qershor të këtij viti, është bërë e mundur pas shkëmbimit të vazhdueshëm të informacioneve ndërmjet policisë së shtetit, DSS/OCIU pranë Ambasadës së Shteteve të Bashkuara, Tiranë dhe Shërbimit të Marshallëve Amerikanë.
p.c. / dita
