Dan Hutra, autori i vrasjes së tre grave në të njëjtën ditën në Tiranë, ka dalë sot para trupit gjykues për masën e arrestit.
Brenda kafazit të qelqtë, Hutra ka qëndruar fillimisht i heshtur, duke mos nxjerrë asnjë fjalë, ndërsa në dorë mbante një shishe ujë.
Kur është pyetur nuk ka shfaqur asnjë shenjë pendese para trupës gjykuese por ka thënë se kishte planifikuar gjithçka.
“Nuk jam i penduar, i kam bërë me konshiencë krimet. Jam dënuar pa faj për dhunën në familje, nuk e kisha prekur”, tha Hutra.
Gjatë seancës, gjyqtarja e ka pyetur nëse e di që me këto akuza rrezikon burgim përjetë. “As më intereson fare”, ka thënë Hutra, “edhe 5 burgime të përjetshme të jenë, e kam mbyllur”.
Në përfundim të seancës, Gjykata e Tiranës ka lënë në burg Dan Hutrën.
Masakra me tre gra të vrara
Personi i parë që ishte në shënjestrën e Hutrës ishte Marjana Gurakuqi, me të cilën pretendon se ka pasur lidhje intime 15 vite më parë dhe në të njëjtën kohë e akuzon për një borxh prej 80 mijë euro.
Shënjestra e dytë ishte ish-bashkëjetuesja e tij Elena Hysa. Ai mendon se ajo e kishte tradhtuar dhe fëmija që kishte lindur nuk ishte i tiji. Dyshimet e shtynë Hutrën që të shkonte në banesën e ish-bashkëjetueses për të vrarë atë dhe babain e saj.
Por atje qëlloi për vdekje Mevlute Hysën dhe Hasime Dafkun 30 vjeçe. Elena dhe nëna e saj mbetën të plagosura.
Më tej, është larguar për të kryer një tjetër vrasje, këtë radhë ndaj familjes së Vladimir Kurtit me të cilin ishte konfliktuar në qeli. Në fund, lëvizi me makinën që kishte marrë me qera drejt Kombinatit për të kryer vrasjen e fundit.
Hutra do të mbrohet nga një avokat i caktuar nga shteti.
o.j/dita
