I zbuloi celulari i gruas së Evis Berberit, Gjykata e Lartë çel pas tre muaj shtyrje gjykimin për Benet Becin dhe 6 të tjerë

Hetimet kanë marrë një kthesë pas zbërthimit të telefonit celular të bashkëshortes së Evis Berberit, ish-drejtorit të ARRSH-së dhe një prej bashkëpunëtorëve më të afërt të Belinda Ballukut. Në telefon u gjetën biseda të kodifikuara, shënime mbi transferta financiare, si dhe detaje komprometuese mbi faturimet dhe ndarjen e përqindjeve të ryshfeteve nga tenderat publikë.

Pas tre muajsh shtyrje të seancave, Gjykata e Posaçme çeli të hënën shqyrtimin gjyqësor ndaj kreut të Bashkisë së Shkodrës, Benet Beci, i akuzuar nga SPAK për shkelje të barazisë në një tender gjatë kohës që drejtonte Korporatën Elektroenergjetike Shqiptare.

SPAK akuzon si bashkëpunëtorë të Becit edhe gjashtë të pandehurit e tjerë, Adela Ruko, Edlira Mitrushi, Jonid Kazani, Yllka Nishku, Premtim Dauti dhe Rudin Gjoni.

Nga shtatë të pandehurit, vetëm Premtim Dauti ka kërkuar gjykim me procedurë të zakonshme. Gjashtë të pandehurit e tjerë konfirmuan qëndrimin e tyre për procedimin me gjykim të shkurtuar.

Gjykata vendosi ndarjen e çështjes për Dautin.

Në vijim, prokurori Dritan Prençi paraqiti parashtrimet duke i qëndruar kërkesës për gjykim. Sipas tij, të pandehurit kanë shkelur barazinë mes operatorëve në një tender konsulence të zhvilluar nga KESH në vitin 2019 me objekt “Zhvillimi Strategjik i Sektorit Energjetik”, me fond limit 69 milionë lekë.

SPAK vlerëson se i pandehuri Benet Beci, në bashkëpunim me gjashtë vartësit e tij, kanë vepruar në kundërshtim me legjislacionin për prokurimet publike, duke paracaktuar dhe krijuar avantazhe dhe privilegje të padrejta për shoqërinë fituese të tenderit, “Consulting & Management Albania” sh.p.k,”.

Përfaqësuesit ligjorë të të pandehurve Adela Ruko, Edlira Mitrushi, Jonid Kazani, Yllka Nishku dhe Rudin Gjoni, sollën në vëmendje të gjykatës ligjin nr. 57/2026, datë 18.6.2026, “Për dhënie amnistie”, duke pretenduar se çështja ndaj të mbrojturve të tyre duhet të pushohet.

Ata argumentuan njëri pas tjetrit se të pandehurit nuk janë subjekte të posaçme dhe për rrjedhojë, vepra penale për të cilën akuzohen përashikon një masë dënimi që sipas këtij ligji, bënë që të pushohet çështja.

Mbrojtësi i Becit nuk parashtroi kërkesë për përfitimin nga ligji “Për dhënie amnistie”.

Benet Beci, për arsye të funksionit shtetëror që ka mbajtur në kohën kur sipas SPAK ka ndodhur vepra penale, ka qenë subjekt deklarues pranë ILDKPKI-së, duke u konsideruar zyrtar i nivelit të lartë, ç’ka e bënë atë subjekt të posaçëm.

Lidhur me këto kërkesa, prokurori Dritan Prençi tha se do të mbajë qëndrim në seancën e ardhshme, kur do të paraqesi edhe bisedimet përfundimtare.

Seanca u shty për më datë 14 shtator, në orën 09:00.

Hetimi ndaj Becit dhe ish-vartësve të tij për këtë çështje filloi pas verifikimit dhe analizimit të provave materiale të sekuestruara gjatë kontrollit të ushtruar në banesën e bashkëshortit të të pandehurës Edlira Ruko, Evis Berberit, i cili edhe ky akuzohet për shkelje të barazisë në tendera e pastrim parash në çështje të tjera.