Policia e Tiranës ka ndaluar nënën që braktisi foshnjen menjëherë pas lindjes në katin nëntokë të një pallati në Yzberisht.
Ajo është identifikuar si shtetasja me iniciale E.L, 30-vjeçe nga Pogradeci dhe është shoqëruar mbrëmjen e sotme në polici për veprime të mëtejshme.
Lidhur me ngjarjen e rëndë reagoi edhe ministri i Brendshëm, Taulant Balla, duke kërkuar që policia të identifikojë “prindërit e papërgjegjshëm” dhe t’i nxjerrë para drejtësisë.
“Prej mesditës së sotme një foshnje e braktisur në zonën e Yzberishtit në Tiranë, po lufton për jetën, ndërsa u dërgua në spital me urgjencë nga një patrullë e Policisë së Tiranës. I falenderoj mjekët e Spitalit Obstetrik-Gjinekologjik “Koço Gliozheni” për kujdesin e tyre. I kam kërkuar Policisë së Shtetit të identifikojë me patjetër prindërit e papërgjegjshëm dhe vendosjen e tyre para drejtësisë”, deklaroi Balla.
30-vjeçarja është duke u marrë në pyetje nga policia lidhur me ngjarjen ndërsa foshnja ndodhet në intubim, në gjendje kritike për jetën në Maternitetin Koço Glozheni.
a.c./dita
