Një bashkëpunim i gjerë kërkimor i koordinuar nga CNR-IFT (Instituti i Teknologjive Biomedikale të Këshillit Kombëtar të Kërkimit në Itali), në bashkëpunim me Universitetin Link, IRCCS Santa Lucia, Universitetin “La Sapienza” dhe Polikliniken “Umberto I”, ka hedhur dritë mbi një nga mekanizmat më kompleksë se si kanceri i prostatës i shmanget kontrollit të sistemit imunitar.
Hulumtimi, i publikuar në revistën shkencore Journal of Experimental & Clinical Cancer Research sjell një hap të rëndësishëm përpara në kuptimin e imuno-supresionit tumoral.
Si funksionon mekanizmi i fshehjes tumorale?
Për vite me radhë, një nga sfidat më të mëdha në trajtimin e kancerit të prostatës ka qenë fakti se ky lloj tumori shfaq një përgjigje të kufizuar ndaj strategjive të imunoterapisë (i njohur gjithashtu si immune cold tumor).
Studimi i ri ka zbuluar se qelizat kancerogjene arrijnë ta bëjnë këtë duke përdorur disa vesikula extra-celulare të cilat transportojnë sinjale përmes gjakut. Këto struktura kontaktojnë dhe riprogramojnë qelizat imunitare të njohura si makrofagë, duke i orientuar ato drejt një sjelljeje më pak efektive në luftimin e sëmundjes.
Në qendër të këtij boshti komunikimi ndodhen dy mikroRNA specifike (miR-302/367 cluster), prania e të cilave u konfirmua përmes analizave të kryera te rreth 80 pacientë. Eksperimentet laboratorike treguan se këto molekula riprodhojnë drejtpërdrejt efektet imunosupresive te makrofagët, ndërsa privimi i tyre ndihmon në kthimin e qelizave në një profil mbrojtës më aktiv (M1-like).
Perspektivat dhe kujdesi shkencor
Edhe pse rezultatet përfaqësojnë një ecje përpara në onkologjinë molekulare dhe hapin rrugë të reja për përdorimin e biopsisë së lëngshme (liquid biopsy), shkencëtarët theksojnë se ky është ende një zbulim në fazë eksperimentale laboratorike.
Kjo do të thotë se nuk bëhet fjalë ende për një terapi të gatshme klinike ose për një trajtim të provuar me sukses në pacientë që mund të ndryshojë menjëherë qasjen e menjëhershme terapeutike. Megjithatë, zbërthimi dhe kuptimk i këtij kanali komunikimi mes tumorit dhe sistemit imunitar krijon bazat për zhvillimin e strategjive të ardhshme që synojnë të kthejnë mbrojtjen natyrore të organizmit kundër këtij kanceri.
n.s. / dita
