Ilaçet kundër depresionit të përdorura gjerësisht shkaktojnë “tronditje emocionale”, sipas një studimi që tregon se si mund të funksionojnë ilaçet dhe efektet e tyre anësore të mundshme.
Studimi zbuloi se vullnetarët u bënë më pak të përgjegjshëm ndaj reagimeve pozitive dhe negative pasi morën një antidepresant për tre javë.
Të jesh emocionalisht i mpirë mund të jetë arsyeja pse antidepresantët i ndihmojnë njerëzit të shërohen nga depresioni.
Autorja e studimit, Barbara Sahakian tha se në një farë mënyre, kjo mund të jetë pjesërisht mënyra se si funksionojnë. Ato largojnë një pjesë të dhimbjes emocionale që ndjejnë njerëzit që përjetojnë depresion, por për fat të keq duket se ata gjithashtu heqin një pjesë të kënaqësisë.
Gjetjet mund t’i ndihmojnë pacientët të bëjnë zgjedhje më të informuara për mjekimin e tyre, tha ajo, por shtoi se “nuk ka dyshim se ilaçet kundër depresionit janë të dobishëm” për shumë pacientë.
Disa njerëz që marrin ilaçe raportojnë se ndjehen të mërzitur ose nuk i shohin më gjërat si të këndshme, me një studim që tregon se kjo vlen për 40-60% të njerëzve që marrin ilaçin. Megjithatë, ka qenë e paqartë nëse kjo simptomë është një efekt anësor i ilaçit apo një simptomë e depresionit.
Studimi i fundit tregon se është ilaçi ai që prodhon zbehje emocionale. Në studimin e botuar në revistën Neuropsychopharmacology, 66 vullnetarëve iu dha një antidepresant për të paktën 21 ditë përpara se të bënin një sërë testesh njohëse.
Pothuajse në të gjitha testet, përfshirë ato që vlerësojnë vëmendjen dhe kujtesën, ilaçi nuk bëri asnjë ndryshim.
Megjithatë, njerëzit që merrnin antidepresant ishin më pak të prirur që ti përgjigjeshin reagimeve pozitive ose negative.
Sahakian thotë se ky zbulim mund të jetë i dobishëm për pacientët.
“Të paktën ata mund të jenë të vetëdijshëm për këtë. Disa njerëzve mund t’u ofrohen forma të ndryshme trajtimi”.
Profesoresha Catherine Harmer, e Universitetit të Oksfordit, tha se ky studim është shumë i rëndësishëm për pacientët por edhe për mjekët të cilët e shohin dhënien e antidepresantëve si zgjidhje për depresionin.
Burimi: The Guardian
