Ilir Alimehmeti nuk i ndahet Këlliçit, e thumbon për Berishën: “Mentorët duhet ta lënë fidanin të rritet, duhet të krijojë karakterin dhe unin e vet”

Një nga kadidatët e primareve të PD për Tiranën, Ilir Alimehmeti ka bërë një deklaratë surprizuese dje në ABC, kur u pyet për rivalin e tij, Belind Këlliçi, që duket se i shton pak dozën përplasjes mes tyre në distancë.

Në fjalët e tij, Alimehmeti lë të kuptohet indirekt se Këlliçi ka mbështetjen e Sali Berishës dhe po ndjek linjën e diktuar nga Berisha, por ndikimi që ka Berisha tek Këlliçi, po i lë pak hapësirë për të krijuar karakterin e tij.

“Një këshillë kisha unë, si për çdo të ri, pra nuk po e ndaj këtë vetëm për z. Këlliçi, por për çdo të ri. Vjen një moment kur mentorët duhet të qëndrojnë një çast më lart, që të lejojnë që fidani të rritet vetë, atje ku e ka gjenin e vet. Pra, kur pemët e mëdha të mbulojnë nga sipër, fidani nuk e gjen hapësirën, duhet të ketë pak më tepër ajër dhe energji, që të eci përpara dhe të zhvillohet siç duhet. Ka gjëra të mrekullueshme në atë drejtim, mund të ecë përpara, por ka nevojë për pak hapësirë dhe për pak, le të themi, të krijojë atë uni-n, atë karakterin e tij. Ne vuajmë shumë nga ndjekja e linjës së të të tjerëve, duhet të kemi linjën tone”, u shpreh Alimehmeti për Këlliçin.