Një parcelë me 270 bimë kanabis sativa është zbuluar sot në ‘Malin e Rrencit’ në Lezhë. Parcela u gjet në ambient të hapur, si rezultat i kontrolleve të pandërprera në zona të pyllëzuara dhe në terrene malore të qarkut, duke përdorur edhe dronët. Policia ende nuk e ka zbuluar se cilët janë kultivuesit. Gjatë kësaj faze të planit operacional “Imazhi”, si rezultat i përdorimit të dronit, në një ambient të hapur, pronë publike, u konstatuan të mbjella rreth 270 bimë të dyshuara narkotike cannabis sativa, të cilat u asgjësuan me anë të djegies.
“Komisariati i Policisë Lezhë, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Lezhë, vijon veprimet hetimore, me qëllim identifikimin dhe arrestimin e autorit/ëve të kësaj veprimtarie kriminale. Materialet procedurale i kaluan Prokurorisë, për veprime të mëtejshme, për veprën penale “kultivimi i bimëve narkotike”, thuhet në njoftimin zyrtar.
