Pas verifikimeve të kryera, policia e Kukësit ka sqaruar incidentin e ndodhur në fshatin Bushat, për të cilin u raportua se 4 persona u konfliktuan për denoncime të shitblerjes së votës.
Sipas policisë për rastin në fjalë u shoqëruan 4 persona dhe u bllokua një mjet, por që nga kontrolli nuk është gjetur asnjë mjet i kundërligjshëm. Sipas policisë, vetë palët kanë deklaruar se konflikti ndodhi si pasojë e një keqkuptimi.
Rasti u denoncua në polici më 11.05.2023, rreth orës 23:50, ku B. S., banues në fshatin Bushat, ka njoftuar Policinë se kishte një konflikt me disa shtetas, në fshatin Bushat.
“Nga verifikimet paraprake ka rezultuar se ky shtetas ishte përshirë në një konflikt për motive të dobëta, në rrugë, me 3 shtetas të tjerë. Gjatë kryerjes së veprimeve procedurale, palët e përfshira në konflikt nuk kanë ngritur pretendime që gjatë konfliktit të jenë kanosur me armë, për asnjë motiv, por kanë deklaruar se konflikti ka ardhur si pasojë e një keqkuptimi”, njofton policia.
4 të shoqëruarit B. S., N. S., të dy banues në fshatin Bushat, Q. H. dhe L. Gj., të dy banues në Kukës. ,janë lënë më pas të lirë.
Gjithashtu automjeti tip “Mercedes Benz”, me të cilin qarkullonin shtetasit Q. H. dhe L. Gj. Gjatë kontrollit të ushtruar në këtë automjet nuk është gjetur asnjë send i kundërligjshëm.
Materialet për këtë rast i kaluan Prokurorisë, për vlerësim.
p.k\dita
