Tre ditë më parë ndodhi një incident në operacion policor në kryeqytet, pranë zonës së “Astirit”. Bëhej fjalë për arratisjen e dy vëllezërve të dyshuar si përdorues dhe shpërndarës droge, që jo vetëm sulmuan dy efektivët në aksion, por edhe u ikën nga duart duke i goditur me grushte, edhe pse njëri prej tyre me pranga në duar. Policia e Tiranës ka reaguar dje në lidhje me një video të bërë virale në mediat sociale, ku shihen momentet e filmuara të incidentit. Një prej vëllezërve, tashmë i arrestuar, në përpjekje për t’i ikur policit që e kishte lidhur në pranga, e sulmon dhe godet atë vazhdimisht, derisa i shpëton. Sipas bluve të kryeqytetit, F.S., 22-vjeç, ka mundur të largohet, por është kapur nga forca të tjera të policisë, bashkë më vëllanë e tij, menjëherë sapo u zbulua banesa ku jetonin dhe po fshiheshin. Policia njofton se është arrestuar më 26 mars F. S., 22 vjeç, banues në Tiranë, për veprën penale “kundërshtimi i punonjësit të policisë së rendit publik”. Gjithashtu, për këtë rast, ka nisur procedimi në gjendje të lirë, për vëllanë e 22-vjeçarit, shtetasin Xh. S., 26 vjeç. Sipas policisë, rreth orës 23:00 të datës 25 mars, në rrugën “Aleksandri i Madh”, në Unazë të Re, shërbimet e Patrullës së Përgjithshme kanë konstatuar shtetasit F. S. dhe Xh. S. (vëllezër), të cilët dyshohet se kanë qenë duke konsumuar lëndë narkotike kanabis. Në momentin e ndërhyrjes së Policisë, shtetasi Xh. S. është larguar me vrap, ndërsa shtetasi F. S., gjatë ndalimit, ka kundërshtuar me forcë punonjësin e Policisë. Ndaj tyre rëndon akuza “kundërshtimi i punonjësit të policisë së rendit publik”.
Incidenti te “Unaza e Re”/ Policia i kap duke pirë hashash, një nga vëllezërit godet efektivin dhe arratiset i prangosur. Arrestohet në ndjekje
