Ambasadorja franceze: Solidarë me SHBA për non gratat, nëse duhen dënuar, e vendosni ju (INTERVISTA)

“Franca do të rreshtohet gjithmonë krah Shteteve të Bashkuara të Amerikës”, ky është qëndrimi i ambasadores së Francës në Shqipëri Elisabeth Barsacq, e pyetur me qëndrimin që mban shteti që ajo përfaqëson në lidhje me shpalljen “non grata” të Sali Berishës.

Në një intervistë me gazetarin Endri Xhafo, ambasadorja u pyet nëse drejtësia shqiptare duhet të nis një hetim për ish-kryeministrin Berisha lidhur me akuzat për korrupsion. Ajo u përgjigj shkurtimisht duke thënë se kësaj pyetje duhet t’i përgjigjen shqiptarët.

Pjesë nga Intervista:

Gazetari – Lëmë politikën franceze dhe flasim pak për politikën shqiptare, nëse jeni dakord…

Ambasadorja – Oh (qesh). Politikë jashtëzakonisht e komplikuar, që duhet kuptuar…

Gazetari – Një pyetje shumë direkte: A bezdiset Franca nga fakti që Partia Demokratike shqiptare drejtohet aktualisht nga zoti Berisha?

Ambasadorja – Çështja nuk shtrohet ekzaktësisht në këto terma për Francën. Franca konstaton. Shikoni, një ambasadë e Francës në punën e saj ka dy aspekte: Eshtë ajo që do ta quaja “institut kërkimor” në lidhje me vendin pritës dhe, nga ana tjetër, mbajtja gjallë e marrëdhënieve dypalëshe.

Për pjesën “institut kërkimor” do të thoja se jemi më së shumti shkencëtarë që po bëjnë konstatime, pra marrim mikroskopin dhe shohim si funksionojnë mikrobet në atë pllakën e qelqtë poshtë mikroskopit. Kjo është. Dhe në këtë pikë nuk ka pse të jemi të bezdisur, as pse të jemi “pro”, apo “kundër”… Nuk pozicionohemi në këtë mënyrë.

Gazetari – Po e riformuloj pyetjen: A do të rreshtohet Franca me qëndrimet e Shteteve të Bashkuara në raport me zotin Berisha?

Ambasadorja – Franca është solidare me Shtetet e Bashkuara. Gjithmonë! Ne themi gjithmonë në lidhje me Shteteve të Bashkuara se “ne jemi aleati më i mirë i Shteteve të Bashkuara”.

Pikëspari sepse në planin e mbrojtjes, nëse ka një vend që nuk ka rreshtur së financuari mbrojtjen, është pikërisht Franca. Buxhetet tona të mbrojtjes janë konsistente. Mos harrojmë se në nivel kombëtar kemi marinën e dytë më të madhe në NATO, pas asaj të Shteteve të Bashkuara. Mënyrën se si Shtetet e Bashkuara konsiderojnë personin në fjalë, ne e respektojmë.

Gazetari – OK, atëherë po shkoj direkt: A e keni ftuar zotin Berisha në festimet e 14 korrikut (festa kombëtare e Franës)?

Ambasadorja – Ne nuk ftojmë persona që janë objekt, – dhe kjo nuk ka të bëjë vetëm me personin në fjalë, – por ne nuk ftojmë persona që janë objekt i një situate të veçantë përkundrejt Shteteve të Bashkuara, domethënë, pa akses në territorin e Shteteve të Bashkuara.

Gazetari – Autoritetet e drejtësisë së re shqiptare duhet ta hetojnë dhe, nëse mundet, ta dënojnë?

Ambasadorja – Kësaj pyetje duhet t’i përgjigjen shqiptarët. Nuk më takon mua. Unë vëzhgoj ç’bëjnë shqiptarët.

a.m/dita