E përditshmja amerikane New York Times ka publikuar një analizë mbi planet e Iranit për t’u përballur me një sulm të mundshëm nga Shtetet e Bashkuara, në një moment kur tensionet në rajon janë rritur ndjeshëm.
Sipas raportimit, që prej fillimit të janarit, ndërsa Teherani përballej njëkohësisht me protesta të brendshme dhe me kërcënimin e sulmeve nga SHBA-të, Udhëheqësi Suprem Ali Khamenei i është drejtuar një prej bashkëpunëtorëve më të besuar, Ali Larijani, për të drejtuar vendin në këtë fazë kritike.
Larijani, 67 vjeç, ish-komandant i Gardës Revolucionare dhe aktualisht kreu i Këshillit të Lartë të Sigurisë Kombëtare, thuhet se ka marrë një rol dominues në menaxhimin e çështjeve të sigurisë dhe politikës së jashtme, duke lënë në hije presidentin Masoud Pezeshkian. Ky i fundit, një kardiokirurg i kthyer në politikan, ka deklaruar publikisht se “jam mjek, jo politikan”, duke theksuar vështirësitë e mandatit të tij.
Sipas burimeve të cituara nga media amerikane, mes tyre zyrtarë të lartë iranianë dhe anëtarë të Gardës Revolucionare, Larijani ka qenë përgjegjës për menaxhimin e protestave të fundit, ndërsa po ashtu po koordinon marrëdhëniet me aleatë të fuqishëm si Rusia dhe aktorë rajonalë si Katari dhe Omani. Ai gjithashtu mbikëqyr negociatat bërthamore me Uashingtonin dhe harton plane për administrimin e vendit në rast konflikti me SHBA-të.
Në një intervistë për Al Jazeera gjatë një vizite në Katar, Larijani deklaroi se Irani është i përgatitur për çdo skenar. “Jemi më të fortë se më parë. Kemi identifikuar dobësitë tona dhe i kemi korrigjuar. Nuk kërkojmë luftë dhe nuk do ta nisim ne, por nëse na imponohet, do të përgjigjemi”, u shpreh ai.
j.l./ dita
