Një anije mallrash është bërë e treta këtë mëngjes që është goditur nga një predhë pranë Ngushticës së Hormuzit – korridori kryesor i transportit detar që është bërë një pikë qendrore në luftën me Iranin. Anija thuhet se u godit nga një “predhë e panjohur”, ndërsa ndodhej 50 milje detare në veriperëndim të Dubait, tha UKMTO, autoriteti detar përgjegjës për rajonin.
Ndërkohë Shtetet e Bashkuara dhe Izraeli vijuan sulmet në Iranin gjatë orëve natës në atë që Pentagoni i përshkroi si sulme ajrore më intensive që nga fillimi i luftës. Shpërthime të forta u dëgjuan gjatë natës pranë Aeroportit Mehrabad të Teheranit.
Një tjetër sulm ajror izraelit u regjistrua në Bejrut, Liban. Sipas Agjencisë Kombëtare të Lajmeve, “armiku shënjestroi një apartament në lagjen Aisha Bakkar”, në zemër të qytetit.
Aishat Bakkar është shtëpia e shumë refugjatëve që u zhvendosën nga Libani jugor pas fillimit të përshkallëzimit ushtarak.
Irani pretendon se ka kryer sulme në shkallë të gjerë kundër objektivave usharake amerikane dhe izraelite. Garda Revolucionare e Iranit se ka goditur me raketa një bazë ushtarake amerikane në Kuvajt, teksa në shënjestër janë vënë edhe baza Al Udeid në Katar dhe Harir në Irak.
“Baza amerikane në Arifjan u godit me dy raketa nga Garda Revolucionare”, njoftoi IRGC. Kuvajti nuk e ka konfirmuar zyrtarisht sulmin.
Edhe Aeroporti Ndërkombëtar i Dubait u godit nga dy dronë iranianë. Katër persona mbetën të plagosur, tha Zyra e Medias e Qeverisë së Dubait në një postim në X.
“Trafiku ajror po funksionon normalisht”, shtuan ata.
Disa shpërthime të tjera u dëgjuan edhe në Doha, kryeqytetin e Katarit. Ministria e Brendshme e Katarit paralajmëroi më parë për një “kërcënim të lartë sigurie” dhe u bëri thirrje banorëve të mos dilnin jashtë.
j.l./ dita
