Gjykata e Posaçme u detyrua të shtyjë seancën e parë gjyqësore në ngarkim të një 45-vjeçari nga Irani, i dyshuar nga SPAK për përfshirje në planifikimin e akteve terroriste kundër muxhahedinëve të strehuar në Shqipëri.
Bijan Pooldrag, i arrestuar në tetor të vitit 2020 ishte shoqëruar në gjykatë, por mungesa e një përkthyesi gjuhësor, prania e të cilit është e detyruar kur të pandehurit janë të huaj, pengoi vijimin e gjyqit.
Në Gjykatën e Posaçme, Pooldrag është i pandehur për pesë vepra penale, mes të cilave “organizatë terroriste” dhe “ndërhyrje në të dhënat kompjuterike”.
Sipas SPAK, 45-vjeçari ka mbërritur në Shqipëri si pjesë e grupit të muxhahedinëve, por pas disa vitesh qëndrimi ka dalë nga ky grupim, duke u vendosur në një shtëpi me qira në zonën e 5 majit në kryeqytet.
Hetimi i Prokurorisë së Posaçme ka ngritur dyshime se në vitin 2018 Pooldrag ka krijuar kontakte me dy agjentë të shërbimit sekret të Iranit dhe se iu ka përcjellë atyre informacion, fotografi dhe vendndodhje të kampit ASHRAF3 në zonën e Manzës.
Kontaktin me ta e ka kryer përmes aplikacionit telegram, por duke përdorur aparatin telefonik të një vajze në Tiranë, pa dijeninë e saj.
Njëkohësisht, po sipas SPAK, ai ka marrë prej tyre udhëzime për kryerje të mundshme aktesh terroriste ndaj personave të rëndësishëm të kampit ASHRAF 3, akte për të cilët duhet të siguronte një armë zjarri, si edhe duhet të paguante një grupim kriminal për ta kryer. Seanca e radhës për Pooldrag në Gjykatën e Posaçme është në 7 korrik.
o.j/dita
