Ish-presidenti i Sirisë, Bashar al-Assad, vëllai i tij Maher al-Assad dhe kushëriri i tyre Atef Najib janë dënuar me vdekje pasi u shpallën fajtorë për krime të kryera gjatë luftës gati 14-vjeçare në Siri.
Gjykata Penale në Damask ka shpallur të martën fajtor Bashar al-Assadin për vrasje të paramenduar, torturë dhe krime kundër njerëzimit, duke e dënuar me vdekje në mungesë.
Al-Assad u rrëzua nga pushteti në dhjetor të vitit 2024 dhe aktualisht jeton në mërgim në Rusi. Edhe vëllai i tij, Maher al-Assad, i cili ndodhet gjithashtu në Rusi, u dënua me vdekje në mungesë për vrasje të paramenduar dhe torturë.
Ndërkohë, Atef Najib, ish-drejtues i sigurisë politike në provincën Deraa në jug të Sirisë, u dënua me vdekje për “krime kundër njerëzimit”. Najib ishte arrestuar nga autoritetet siriane në janar të vitit të kaluar.
Najib u bë i njohur për rolin e tij në shtypjen e dhunshme të protestave në Deraa në vitin 2011. Reagimi ndaj protestave kontribuoi në përshkallëzimin e kryengritjes, e cila më vonë u shndërrua në luftë civile.
Gjatë seancës, Najib qëndroi brenda kafazit të të pandehurve, i veshur me uniformë burgu, ndërsa gjyqtari lexoi vendimin.
Sipas gjykatës, akuzat ndaj tij përfshijnë vrasje, “vrasjen e qëllimshme të fëmijëve nën moshën 15 vjeç” dhe “torturë që ka çuar në vdekje”.
j.l./ dita
