Ish-princi Andrew lirohet disa orë pas ndalimit

Ish-princi Andrew është liruar vetëm disa orë pas arrestimit për përfshirjen në dosjen “Epstein”.

Policia ka dhënë një përditësim lidhur me hetimin për veprën penale të “sjelljes së keqe në detyrën publike”, ndërsa Andrew u fotografua duke dalë nga një stacion policie pas arrestimit të tij.

“I arrestuari është liruar tashmë”, thuhet në njoftim.

Ish-princi britanik, Andrew Mountbatten Windsor u arrestua ditën e sotme nën dyshimin për shpërdorim detyre, në ditën e tij të lindjes, pasi sot mbushte 66-vjeç.

Andrew Mountbatten-Windsor është anëtari i parë anëtar i lartë i familjes mbretërore në historinë moderne që arrestohet.

Aksioni i policisë vjen pas publikimit të email-eve nga Departamenti i Drejtësisë i SHBA-ve, të cilat duket se tregojnë se ish-duka ka ndarë raporte nga vizita zyrtare në Hong Kong, Vietnam dhe Singapore.

Një email i datës nëntor 2010, duket se është përcjellë nga Mountbatten-Windsor vetëm pesë minuta pasi ishte dërguar nga këshilltari i tij i atëhershëm special, Amir Patel.

Një tjetër, në prag të Krishtlindjes 2010, duket se i dërgon Jeffrey Epstein një dokument konfidencial mbi mundësitë e investimit në rindërtimin e provincës Helmand Province, në Afghanistan.

Më herët Mbreti ka deklaruar se policia ka “mbështetjen dhe bashkëpunimin e tij të plotë”.

Charles tha në një deklaratë të paprecedentë se “ligji duhet të ndjekë rrjedhën e vet”, pasi shprehu “shqetësimin e tij më të thellë” për arrestimin e vëllait.

Andrew u ndalua në ditën e 66-të të lindjes së tij pas një bastisjeje në banesën e tij të re në Sandringham.

Mbreti deklaroi në një njoftim të publikuar nga Pallati Buckingham se hetimi do të gëzojë “mbështetjen dhe bashkëpunimin e tij të plotë”.

Deklarata e Pallatit “Buckingham”:

Mësova me shqetësimin më të thellë lajmin për Andrew Mountbatten-Windsor dhe dyshimin për shpërdorim detyre në funksion publik.

Ajo që pason tani është procesi i plotë, i drejtë dhe i rregullt, përmes të cilit kjo çështje do të hetohet në mënyrën e duhur dhe nga autoritetet përkatëse.

Në këtë drejtim, siç kam thënë më parë, ata kanë mbështetjen dhe bashkëpunimin tonë të plotë.

Dua të deklaroj qartë: ligji duhet të ndjekë rrjedhën e vet.

Ndërsa ky proces vazhdon, nuk do të ishte e përshtatshme që unë të komentoja më tej mbi këtë çështje. Ndërkohë, familja ime dhe unë do të vazhdojmë detyrën dhe shërbimin tonë ndaj jush të gjithëve.

Policia e Thames Valley arrestoi këtë mëngjes vëllanë më të vogël të Mbretit, i teti në radhën e trashëgimisë për fronin britanik, nën dyshimin për shpërdorim detyre në funksion publik.

Daily Mail ishte media e parë që zbuloi se policë me rroba civile, të transportuar me gjashtë automjete të pashënuara, kishin mbërritur në Wood Farm, ku Andrew jeton aktualisht, në orën 8 të mëngjesit.

Kur u arrestua për herë të fundit një anëtar i familjes mbretërore britanike?

j.l./ dita