Një intervistë në Report Tv e ish-shefit të Shtabit të Përgjithshëm të UÇK, Bislim Zyrapi sqaron lidhjen e debatuar mes Dritan Goxhajt dhe luftës së Kosovës.
I sulmuar nga kryeministri Rama dhe mediat afër tij se nuk ka qenë luftëtar i UÇK, Dritan Goxhaj, një nga organizatorët e protestave të fundit, tha në një intervistë disa ditë më parë se ka qenë nën urdhrat e Bislim Zyrapit.
Report Tv ka kontaktuar ish-shefin e Shtabit të Përgjithshëm të UÇK, Bislim Zyrapi.
Ai konfirmoi zyrtarisht se Goxhaj ka qenë pjesë aktive e strukturave të UÇK-së, konkretisht nën komandën e tij gjatë operacionit të njohur “Shigjeta”.
“Është e vërtetë dhe të kuptohet një sen. Unë kam qenë në atë kohë, kur Dritani është kyçyr, kam qenë komandant i operacionit Shigjeta. Kam drejtuar gjithë atë operacionin. Dhe Dritani ka qenë i kyçyr, pra ka qenë e pjesë e operacionit”, tha Zyrapi.
Report Tv ka pyetur nëse Goxhaj kishte qenë në vijën e parë të frontit.
Ish-komandanti i lartë preku thelbin e organizimit ushtarak, duke deklaruar se në një operacion të tillë “të gjithë janë në vijë të frontit” dhe se ekzistojnë dokumente të qarta që vërtetojnë kohën dhe periudhën e kyçjes së Goxhajt.
“Të gjithë janë vijë të frontit. Ka dhe dokumente të tjera që tregojnë në cilën kohë ka qenë i kyçur” – tha ai për Report TV.
Zyrapi e cilësoi të pakuptimtë faktin që pas gati tri dekadash të hapen debate të tilla, duke kujtuar gjithashtu se Goxhaj nuk ka tentuar asnjëherë të përdorë apo të abuzojë me statusin e veteranit apo emrin e UÇK-së në aktivizimet e tij publike apo në protesta.
“Mbas 30 vitesh të flitet për këtë çështje, nuk e di. Dritani nuk është prezantuar si ish-ushtar i UÇK, apo në emër të UÇK, apo në emër të veteranit”.
Dritan Goxhaj, i cili iu bashkua UÇK-së pasi shoqëroi një grup oficerësh amerikanë gjatë konfliktit, shërbeu deri në mbylljen e luftës në qershor të vitit 1999.
Ky konfirmim nga ana e Zyrapit vjen në dritën e traditës familjare të Goxhajt, pasi babai i tij, Dilaver Goxhaj, ka mbajtur gjithashtu një post kyç si zv.shef i Shtabit të Përgjithshëm të UÇK-së në atë periudhë.
n.s. / dita
