Sipas operatorëve turistikë, godina që njihet sot si “vila e Enver Hoxhës në Bllok” është një nga kureshtitë kryesore tek të huajt që vizitojnë Tiranën.
Megjithëse tashmë e rrethuar nga pallate dhe lokale, vila dhe oborri i saj kanë arritur të mbeten deri tani të paprekura.
Historia e kësaj shtëpie zë fill ne vitet ’40.
Kur erdhi në pushtet Enver Hoxha qëndroi fillimisht në hotel “Dajti” në Tiranë. Pak ditë më vonë ai u vendos në vilën për të cilën po flasim, më saktë në një pjesë të saj, pasi vila e sotme është bashkim i dy shtëpive.
Shtëpia ku u vendos Hoxha, në vitin 1942 i përkiste shtetases italiane, Velleda Lucia Costa.
Shtëpia tjetër ngjitur me të (nga lindja) ishte e Qemal Biçakçiut, familje e goditur nga komunizmi.
Te shtëpia e Biçakçiut u vendos Koçi Xoxe.
Shtëpia ku qëndroi Hoxha ishte ndërtuar në një truall në pronësi të deputetit Hamit Myftiu nga Berati.
Këtë truall, Myftiu ia dha me qira për 99 vjet sipërmarrësit italian Vittorio Belloti.
Gjatë kohës së qirasë, aty u ndërtua shtëpi. Më 1942, Velleda Lucia Costa nga Gjenova e bleu truallin dhe shtëpinë mbi të.
Por ajo nuk banoi dot aty pasi Lufta përmbysi gjithçka të mëparshme.
Deri në vitin 1944 aty vazhdoi të banonte sipërmarrësi italian Belloti dhe për një periudhë kohe edhe tregtari Petraq Katro nga Korça.
Pikërisht në këtë shtëpi u vendos familja Hoxha pasi ajo u shtetëzua.
Pasi Koçi Xoxe u largua nga shtëpia ngjitur e Qemal Biçakçiut, dy godinat u lidhën me një korridor të përbashkët.
Në vitin 1973 ngjitur me këtë bashkim u ndërtua edhe një shtesë.
Kjo e gjitha është ajo që njihet sot si vila nr. 31.
Vila nuk u privatizua nga familja Hoxha, pas ’90. Pas largimit të tyre ajo vazhdon shërben si rezidencë qeveritare dhe kureshtje turistike.
Më poshtë, pamje nga brendia e saj kur ajo u restaurua dhe u hap për publikun:
