Është arrestuar super mashtruesi me paratë virtuale, i shpallur në kërkim ndërkombëtar, Faruk Fatih Özer.
ABC shkruan se shtetasi turk i akuzuar për mashtrim me qindra milion dollarë, ka qenë duke pushuar në një plazh në jug të vendit, kur i janë vënë prangat.
Shtetasi turk i akuzuar për mashtrim me qindra milion dollarë, ka qenë duke lëvizur prej shumë kohësh i lirë nëpër Shqipëri, por vetëm sot është bërë i mundur arrestimi i tij.
Faruk Fatih Özer prej kohës ishte arratisur nga Turqia, së fundmi banonte në lagjen “5 maji” në Elbasan.
Mësohet se Faruk Fatih Özer, ka qenë nën shoqërinë e Edevaldo Haxhiut, nipit të kreut të FSHF, Armando Dukës kur u arrestua. Po ashtu edhe Edevaldo Haxhiut i janë vënë prangat.
CNN turk raporton se i shumëkërkuari u kap në rajonin e Vlorës, ndërsa ka qenë ministri i Brendshëm i Shqipërisë, Bledi Çuçi, i cili informoi homologun e tij turk, Süleyman Soylu.
Sipas informacioneve në mediat turke, identiteti i Özer u konfirmua nga rezultatet biometrike. Ndërkohë që kanë nisur edhe procedurat e ekstradimit të Fatih Özer në Turqi.
Faruk Fatih Özer u arratis nga Turqia duke mashtruar dhjetra mijëra turq, të cilët kishin investuar paratë e tyre në monedhën virtuale turke “Thodex”, e cila shpalli falimentin.
j.l./ dita
