OBSH deklaroi dje zyrtarisht mbylljen e emergjencës globale, lidhur me pandeminë e shkaktuar nga Covid 19.
Një nga mjekët tanë më të mirë, i cili ishte në krye të përballjes me këtë pandemi në Shqipëri, në një shënim në profilin e tij në FB, e konsideron këtë vendim, shkencërisht të vonuar dhe me pasoja të rënda.
Ai e ka deklaruar rreth një vit më parë që kjo emergjencë duhej mbyllur, pra ky vendim duhej marrë më herët. Por interesat financiare kanë prevaluar mbi ato të shëndetit, – konkludon mjeku i njohur. Më poshtë, postimi i tij botuar nga DITA:
Nga Dr.Tritan Kalo
Burokratëve dhe specialistëve shterpë të OBSH/WHO u del droja dhe deklarojnë sot më së fundmi se “Emergjenca globale e Covid-19, ka mbaruar”!
Me modesti por me BINDJE TË PLOTË SHKENCORE, unë Dr. Tritan Kalo e kam deklaruar publikisht këtë fakt mbi një vit më parë, në përvjetorin e dytë të shpalljes nga OBSH/WHO më 16 Mars 2020, të Pandemisë së shkaktuar nga virusi Sars-Cov2/Covid-19.
PROFESIONALIZMI si dhe bazamenti solid i DIJEVE të mia shkencore në domenet e Infektologjisë dhe të Epidemiologjisë së Sëmundjeve Infektive, eksperienca e Pandemive të mëparshme dhe bazuar objektivisht në numrin dhe në ecurinë e rasteve të të prekurve nga virusi i Sars-Cov2/Covid-19 në Shqipëri dhe kudo në Botë, bënë që unë të mbërrija në këtë përfundim të guximshëm dhe antikonformist, në lidhje me evolucionin e kësaj “flame mbarëbotërore”.
Përtej modestisë sime model, më duhet të pohoj se SHQIPËRIA jonë e këndej Drinit ka shumë e shumë bijë e bija si unë, të formatuar profesionalisht, tejet cilësisht, në shumë e shumë sfera të aktiviteteve shkencore, dijedhënëse, prodhuese e shoqërore.
Nëse PROFESIONALIZMI dhe MERITOKRACIA do të prevalonin në këto sfera mbi partitizmin, mbi klanet, mbi konformizmin, mbi nepotizmin dhe mbi mediokritetin, unë jam plotësisht i bindur se edhe kontributet tona në të mirën e vëndit dhe të shoqërisë shqiptare, do të ishin shumë-shumë më të mëdha, shumë e më shumë më dobiprurëse për të tashmen si dhe të ardhmen e tyre. “Scientia potentia est” (Shkenca është forcë – Latinisht).
INTERESAT financiare që prevaluan mbi interesat e mirëfillta të Dhënies së Kujdesit Mjekësor, në ato çka thuheshin e rekomandoheshin prej shumicës së Organizmave Ndërkombëtare si WHO, CDC, ECDC, etj, lanë gjurmë të thella në këtë zhagitje të pa justifikueshme të Pandemisë së Sars-Cov2/Covid-19.
ENDEMICITETI i Sars-Cov2/Covid-19 don të thotë se raste të shkëputura të saj do të izolohen herë pas here, dhe janë ato që mbajnë të pranishëm këtë infeksion në mesin tonë si dhjetra-mira të tjerë.
Katër sivëllezërit e tij të vegjël janë izoluar e izolohen për çdo vit si pjesë e panelit të katareve stinore, që prej vitit të largët 1962.
Together forever!!
——-
Marrë me lejen e autorit, nga faqja e tij në Facebook
