Tre persona të arrestuar në kuadër të operacionit “Plumbi i Artë” pas dëshmisë së të penduarit të drejtësisë Nuredin Dumani kanë kërkuar masë më të butë sigurie.
Sipas Abc, Fatos Gosa, Petrit Qoli dhe Agron Qoli i janë drejtuar gjykatës me kërkesë për pretendimet e tyre.
Fatos Gosa rezultoi në dosjen hetimore si informator i vrasësve me pagesë. Ai dyshohet se kishte dhënë informacion për vendndodhjen e Andi Zylyfit, i ekzekutuar në Peqin, ngjarje e ndodhur në fund të vitit 2019. Kjo ka rezultuar edhe në dëshmitë e familjarëve të këtij të fundit para grupit hetimor në lidhje me çështjen.
Nga ana tjetër, Petrit Qoli u vu në prangat e policisë me urdhër të SPAK pasi dyshohet se kishte shërbyer si ndërmjetës mes vëllait të tij Festimit dhe killerit Nuredin Dumani për vrasjen e Fatmira Dedës disa vite më parë.
“Për çdo lëvizje që bënte Fatmira unë flisja më të vëllain e Festimit, Petritin të cilin e informoja për çdo lëvizje por jo për planin. Petriti merret me biznes”, thuhet në dëshminë e të penduarit të drejtësisë.
j.l./ dita
