Aktivisti Arbër Lleshi, i ftuar në emisionin “Të Paekspozuarit” në MCN TV, ka rrëfyer dhunën policore pas protestët në Kuvendin e Shqipërisë.
Lleshi tha se është goditur nga një civil në makinën e policisë, ndërkohë që ka qenë i prangosur dhe efektivët që gjendeshin në automjet nuk kanë bërë asgjë.
“Më shtrinë në tokë me goditje me shkopinj. Pastaj më morën. Ishte një civil brenda në automjetin e policisë. Kam qenë i prangosur, ky person më ka goditur rreth 30 herë me grushta në fytyrë.
Policia e Shtetit, e lejon këtë? – u kam thënë dy policëve që ishin aty dhe e kanë mbyllur gojën. Në komisariat u kam thënë oficerëve, më ka dhunuar dikush civil brenda në makinën e policisë, përgjigja ishte duro.
I thashë më goditën me grushta kur kam qenë i prangosur. Quhet torturë. Kam kërkuar ndihmë mjekësore, katër orë rresht, askush nuk e ka vënë ujin në zjarr.
Pas gjithë kësaj, kanë firmosur një procesverbal, edhe pse nuk kishin prova. Thuhej je ilmuar duke hedhur sende të forta drejt policisë, i them ku janë këto prova. Do t’ja japim prokurorit thanë.
Policia funksionon si mjet represioni. Kam thënë edhe në sallë të gjyqit, që përveç gjykatës që duhet të merret me personat e dhunshëm në Policinë e Shtetit dhe institucioni ka detyrimin ligjor që policët e dhunshëm ti veçojë dhe ti padisë për dhunë.
Do ta ndjek deri në fund. Nuk e di a janë të gjithë pamjet, por kanë dalë 2-3 video nëpër media. Do ti mbledhim të gjitha.
E kam pyetur personin civil kush je. E pyeta kush jeni ju, me çfarë forme pretendoni se keni këtë fuqi. Më tha jam gangster i gangsterëve, ta mbyll gojën me ngjitës.
Çfarë do të na thotë kryeministri me syze me lara për këto? Kemi katër ditë atje, na kanë mbajtur në dhoma paraburgimi në kushte mizerabël”, tha ndër të tjera Lleshi.
Mamaja e tij ka folur sot në protestë.
“Jam mamaja e Arbër Lleshit, të cilin ma arrestuan më 2 korrik. Shenjat e grushtave në furgonin e policisë i ka edhe tani që është data 6! Kur kam parë videon që dhunojnë tim bir u bëra më e fortë dhe thashë: Nëse kam ardhur një ditë po e një ditë jo se jam e sëmurë, që sot e tutje përditë këtu në shesh do jem”.
Në fjalën e saj, ajo e cilësoi kreun e qeverisë si një figurë që nuk e meriton më titullin kryeministër.
“Edi Ramës po i them kështu: Ti kujton se do na trembësh me arrestimin e fëmijëve tanë? Përkundrazi! Jemi bërë edhe më të forta dhe do jemi këtu në shesh! Jo 37 ditë, por 37 javë e 37 muaj po deshe! Deri sa klasa politike e qelbur që masakroi këtë popull të shkojë në koshin e plehrave. Një kryeministër i tillë nuk e ka parë historia! Kryehajdut, ti nuk e meriton fjalën kryeministër më! Nuk e gënjen dot më këtë popull”, tha ajo.
n.s. / dita
