Jehona e zgafellave për Non-Gratën: Vdekja misterioze e shefit të armatimit

Prapaskenat e lobimeve milionëshe në SHBA për heqjen e Non Gratës ndaj Berishës lidhen drejtpërdrejt me zhdukjen misterioze të municioneve në Shqipërinë e viteve ’90. Dokumentet amerikane zbulojnë fakte tronditëse për vdekje misterioze dhe dëshmi të fshehta që mund të shkaktojnë një tërmet politik në Tiranë…

Në muajt e parë të presidencës së Donald Trump, një investim i madh prej 6 milionë dollarësh u përdor për lobimin me qëllim heqjen e statusit Non Grata për Sali Berishën. Ky investim i konsiderueshëm ndodhi pikërisht kur u bë e qartë se SHBA-ja kishte nisur procedurat e sanksionimit edhe për bashkëpunëtorë të Viktor Orbanit dhe aktorë të tjerë politikë në rajon. Përveç Berishës, edhe Milorad Dodik kishte pajtuar figura të rëndësishme, si Rudy Giuliani, për të luftuar sanksionet amerikane.

Megjithatë, politika e fushatës së Trump-it dhe realiteti politik pasi ai u vendos në pushtet janë dukshëm të ndryshme. Në këtë kontekst bie në sy që një nga mbështetësit fillestarë të Sali Berishës në Kongresin Amerikan ishte kongresmeni Lee Zeldin nga Nju Jorku. Zeldin kundërshtoi shpalljen e Berishës Non- Grata, kryesisht i nxitur nga një pjesë e komunitetit shqiptar në SHBA.

Në vitin 2021, Sekretari amerikan i Shtetit, Antony Blinken, konfirmoi ekzistencën e dokumenteve të klasifikuara që justifikojnë shpalljen Non- Grata të Berishës, dokumente që kongresmeni Zeldin i ka parë personalisht. Burime pranë tij bëjnë me dije se informacioni i përfshirë në këto dokumente është tronditës dhe i detajuar.

Ndër të tjera, këto dokumente përfshijnë dëshmi rreth zhdukjes së armatimeve dhe municioneve në vitet e hershme të demokracisë në Shqipëri.

Në dokumente thuhet se një zyrtar i lartë i Ministrisë së Mbrojtjes me inicialet M.Gj., i cili fillimisht kishte qenë shef i armatimit në një rreth periferik, u emërua në vitin 1992 si shef i Armatimit në rang kombëtar. Për disa muaj, ndodhi një zhvendosje masive dhe e dyshimtë e municioneve dhe armatimeve, që ai i dokumentoi me detaje të sakta dhe ia dorëzoi këto shënime strukturave të larta shtetërore. Menjëherë pas kësaj, ai u shkarkua dhe u cilësua si “i çmendur”. Pak vite më vonë, ai ndërroi jetë në rrethana të dyshimta, duke nxitur dyshime për përdorim ilaçesh të rrezikshme.

Gjithashtu, këshilltari amerikan i Ministrisë së Mbrojtjes në atë periudhë, Denny Lane, ka botuar dëshmitë e tij në një libër që e përshkruan përplasjen rreth armatimeve gjatë viteve 1994-1995. Por periudha më e errët dhe më e rëndë e zhdukjes së armatimeve rezulton të jetë gjatë viteve 1992-1993, detaje të cilat këshilltarët e Berishës duket se kanë shumë interes t’i mbajnë larg një procesi gjyqësor në SHBA, që mund të zbulojë fakte të rënda./Pamfleti