“Jemi turistë, ngatërruam rrugën”, dëshmia e çekëve që u kapën dje në tunelin e uzinës së Poliçanit

Zbardhen të tjera detaje rreth 4 çekëve të arrestuar dje në Poliçan, pas veprimeve të dyshimta se po fotografonin uzinën e armatimeve në këtë qytet.

Duke iu referuar burimeve, fjalët e para që kanë thënë dy çekët që u kapën në tunel ishin me justifikimin se kishin humbur rrugën.

“Jemi turistë, po bënim foto, humbën rrugën dhe u futëm brenda në tuneli. Nuk kemi qëllim të keq”, mësohet të jenë shprehur dy shtetasit me pasaporta çeke.

Ndërkohë pas kontrolleve u ndaluan dhe dy bashkëjetueset e tyre.

Mësohet se dy shtetasit çekë kanë qëndruar për disa orë brenda tunelit të armatimeve ku kishte kundërajror, ndërsa u kapën pasi u konstatua se një prej dyerve ishte shkatërruar.

Ministria e Mbrojtjes ka reaguar për ngjarjen që ndodhi ditën e djeshme.

Ministria sqaron se ngjarja ka ndodhur në orën 08:40 të së dielës, ndërsa sqaron se janë ndaluar dy meshkuj brenda tunelit, ndërsa dy femra po të shtetësisë çeke, bashkëjetuese të dy shtetasve, janë ndaluar pak më larg tunelit.

Reagimi i Ministrisë:

Rreth orës 08:40 të mëngjesit të sotëm, tek një nga tunelet në Uzinën e Poliçanit, janë konstatuar lëvizje të personave të paidentifikuar.

Menjëherë Policia Ushtarake në bashkëpunim me Policinë e Shtetit kanë izoluar hyrjet e tuneleve të cilët janë pothuaj se të gjithë komunikues me njëri tjetrin dhe pas kërkimeve kanë ndaluar dy persona me kombësi çeke.

Rreth orës 12:30 në distancë 1.5 km larg tuneleve jashtë perimetrit të rrethimit të repartit u konstatuan dhe shoqëruan edhe dy shtetase te kombësisë çeke, bashkëjetuese të dy shtetasve të mësipërm.

Personat e mësipërm janë ndaluar dhe aktualisht vazhdojnë procedurat nga autoritetet e sigurisë në vend.

j.l./ dita