Ish-shefi i Krimeve të Policisë Elbasan, Leonard Palushi është dënuar me burg, pasi është shpallur fajtor për korrupsion pasiv.
Gjykata Anti Korrupsion dha këtë të martë vendimin për katër vite burg për ish-shefin e Krimeve, i cili ka dhënë orientim të gabuar gjatë hetimeve mbi vrasjen e Emiljano Ramazanit në Elbasan. Por, duke përfituar nga gjykimi i shkurtuar, ai do të vuajë dy vite dhe katër muaj heqje lirie.
Palushi u arrestua një vit më parë, në kuadër të operacionit “Golden bullet”, mes 31 urdhër arresteve të tjera, por gjykimi i tij u krye veçmas.
Në gjykatë, ish-shefi i Krimeve kërkoi pafajësi, duke këmbëngulur se është polici i ndershëm që i ka shërbyer vendit. Por, SPAK, nga provat dhe dëshmitë e administruara kërkoi dënimin e tij për çështjen e pistoletës që hodhi në vendngjarjen ku u vra Emiljano Ramazani.
Emiljano Ramazani u ekzekutua në korrik të 2020 me pesë plumba në makinën e tij. Viktima po hynte në mes të dy pallateve për të parkuar mjetin e tij, ndërsa një nga autorët ka parkuar mjetin buzë rrugës dhe tjetri ka zbritur dhe me hap të shpejtë ka arritur ta qëllojë me pesë plumba viktimën në momentin që ky i fundit ishte duke parkuar. Më pas, autorët janë larguar duke djegur makinën në një zonë të pyllëzuar, në Papër. Policia gjeti në mjetin e djegur edhe dy armë të tipit kallashnikov.
Në këtë krim, u përfshi dhe ish-zyrtari i policisë, pasi një informator i besuar i tregoi se në servisin e familjes Manhasa ndodhej arma me të cilin u ekzekutua Emiljano Ramazani, por ai e mbajti të fshehtë këtë fakt
o.j/dita
