Juventus-Inter dhe Kremoneze-Fiorentina janë dy gjysmëfinalet e kupës së Italisë. Bardhezinjtë eliminuan Lazion në çerekfinale, në një përballje që prodhoi vetëm një gol. Një gol i Bremer në pjesën e parë solli kualifikimin e torinezëve, të cilët zhvilluan një 90 minutësh pozitiv, në krahasim me skuadrën kundërshtare.
Pavarësisht se vinte me 6 mungesa në këtë përballje, Juventusi duket se nuk pati problem për të arritur triumfin. Në fazën tjetër, bardhezinjtë e Maksimiliano Alegrit përballen me Interin. Këta të fundit mposhtën Atalantën po me rezultat minimal 1-0.
Gjysmëfinalja tjetër është ajo mes Kremonezes dhe Fiorentinës, ku skuadra nga Kremona ka zhvilluar një rrugëtim të jashtëzakonshëm. Dy skuadrat e eliminuara prej tyre në kupë janë Napoli dhe më pas Roma. Sa i përket Fiorentinës në çerekfinale eliminoi Torinon pas fitores 2-1. Ndeshjet e para gjysmëfinale luhen më 5 prill, ndërsa ato të kthimit më 26 prill.
