Ish-deputeti i PS, anëtar i Këshillit Bashkiak të Tiranës, Halit Valteri ka lëshuar akuza të ashpra dhe alegorike ndaj ish-zv.kryeministres dhe Ministres së Infrastrukturës e Energjisë, Belinda Balluku, duke e krahasuar me një “kuçedër” që ka përqendruar para, prona pa fund dhe pushtet, duke përpirë çdo gjë që i del përpara.
Në një postim të gjatë në rrjetet sociale, Valteri tregon se shkak për reagimin e tij u bë një tryezë në hotel “Rogner” në Tiranë me njerëz të biznesit dhe politikës, ku një prej personazheve të njohur të kryeqytetit përdori shprehjen “ministrja që ha burra”.
Kjo batutë, sipas Valterit, shërbeu si pikënisje për të përshkruar një sistem të tërë të përqendrimit të pushtetit pa asnjë kufi. “Një kuçedër që nuk ha vetëm burra, por edhe institucione”.
Në reagimin e tij publik, Valteri thekson se nuk bëhej fjalë vetëm për karakter apo influencë politike, por për një etje të pafundme për kontroll:
“Kjo kuçedër e kësaj historie ishte më moderne. Ajo nuk ushqehej me mish. Ushqehej me pushtet. Në fillim përpin një njeri, pastaj një tjetër… Dikë e afron, dikë e bën të varur, dikujt i hap një derë, dikujt tjetër ia mbyll. Një telefonatë, një firmë, një emërim, një kontratë, një favor, një heshtje. Dhe me çdo kafshatë, kuçedra rritet”.
Sipas ish-deputetit, kjo formë kontrolli kapërcen individët dhe prek direkt funksionimin e shtetit të së drejtës:
“Kur pushteti pa kufi fillon të përpijë kështu institucionet, nuk kemi më thjesht një histori për njerëz të fuqishëm. Kemi një problem me vetë shtetin. Institucioni që duhet t’i shërbejë qytetarit shndërrohet në një vegël. Ligji fillon të duket i madh për të dobëtin e i vogël për të fortin”.
Pasuria, paratë dhe kontrolli i plotë
Valteri ka vijuar akuzat e tij duke përmendur pasuritë e shumta dhe përvetësimin e resurseve publike e financiare:
“Pastaj vjen pasuria. Apartamente, vila, makina, jahte, prona dhe para. Euro, paund, franga, lekë. Për një oreks të tillë, monedha nuk ka rëndësi. Rëndësi ka mundësia për të marrë”.
Në përmbyllje të reagimit të tij, ish-deputeti thekson se shoqëria, drejtësia, media dhe qytetarët nuk duhet të heshtin përballë kësaj situate:
“Kuçedra e përrallave ka shtatë koka. Kjo moderne ka më shumë: një për pushtetin, një për paratë, një për ndikimin, një për biznesin dhe një për heshtjen… Pyetja tani nuk është vetëm sa ka përpirë, por sa do ta lejojmë të përpijë. Kufiri duhet të jetë i qartë: pushteti është për t’i shërbyer shtetit, jo për ta ngrënë atë”.
o.p. / dita
Bela mbaj peris