“Kam sjellë me vete dy dokumente…” Rama thotë se do bëjë kthesë dhe “do skanohet” ligji për Zonat e Mbrojtura

Në një sfond mbretëror si ai i Pallatit të Brigadave, Edi Rama zgjodhi ta përkrijojë këtë herë revoltën e bulevardit jo më si goditje politike, por si një “reflektim përpara pasqyrës”. Me dy dokumente në duar për mandatin e katërt, ai u përpoq t’i kthente protestuesit që kërkojnë ikjen e tij në “matësit e rinj të standardeve” të qeverisë.

“Kam sjellë sot me vete dhe dy dokumente. Janë dy dokumente që mishërojnë reflektimin tim përpara pasqyrës së bulevardit të flamingove dhe janë të hapura për t’u lexuar, ndryshuar që ta përmbushin sa më mirë qëllimin e tyre.

I pari është dokument strategjik për kthesën që duhet të garantojë mandati i katërt në qeverisje. I dyti është një aneks sesi PS duhet ta mbështesë kthesën e mandatit të katërt”, tha Rama.

Ndërkohë për protestuesit që kanë votuar këtë qeveri, tha se janë matësi i ri i standardeve.

“Ju nuk jeni mosmirënjohës, por matës i ri i standardeve tona. Ata që votuan për ne në qershor, dolën dhe u bashkuan me të tjerët edhe kur protesta drejtohej kundër meje sepse forca e saj përthithëse ishte më imponuese për ta sesa figura ime”, tha Rama.

Mësimi i parë që Rama thotë se ka nxjerrë nga protestat përpara kryeministrisë është që njerëzit nuk jetojnë më me çfarë kanë ndodhur, por me pritshmëri.

“Bulevardi i flamingove duhet parë jo si protestë, por pasqyrë që shoqëria na e vuri përpara duke na sfiduar të shohim vetveten dhe të verifikojmë seriozisht nëse e kemi mendjen dhe zemrën në vendin e duhur për ta qeverisur Shqipërië e kësaj faze të re që në radhë të parë dhe me doemos duhet ta kuptojmë ne të parët.

Unë pashë mbylljen e një epoke dhe fillimin e një tjetre. Epoka e mbyllur është epoka e mungesave. Epoka e hapur është epoka e pritshmërive ku rruga e re është standard, jo fitore”, tha Rama.

Lidhur me ligjin për zonat e mbrojtura, Rama tha se “do skanohet dhe përputhet 100% me direktivat e BE”, sipas tij.

Vijon