Një 36-vjeçar, i dënuar edhe më parë për vjedhje, është vënë në pranga nga policia Korçë, pasi akuzohet se i vodhi me dhunë çantën e dorës një 47-vjeçareje. Pasi uniformat blu morën një njoftim për të dyshuarin, se kishte sulmuar dhe me dhunë i kishte marrë çantën një gruaje, nisën menjëherë kërkimet për kapjen. Në bazë dhe të pamjeve filmike dhe provave të tjera të siguruara nga Policia, 36-vjeçari që shoqërohej nga një person tjetër, i ka vjedhur me dhunë çantën 47-vjeçares dhe më pas janë larguar të dy me shpejtësi.
Për këtë shkak u arrestua i riu i identifikuar Edison Foto. 36-vjeçari është autori i dyshuar edhe i dy vjedhjeve të tjera të ndodhura në Korçë, konkretisht: më datë 21.04.2023, në lagjen nr. 6, ka vjedhur sende dhe orendi të ndryshme në banesën e një gruaje, ndërsa më datë 28.04.2023, në lagjen nr. 9, i ka vjedhur çantën e dorës një 52-vjeçareje, brenda së cilës kishte një sasi parash dhe dokumente identifikimi. Ndërkohë, policia po punon për identifikimin dhe kapjen e bashkëpunëtorit të tij. Kurse materialet procedurale i kaluan Prokurorisë së Rrethit Korçë.
