Karikaturistja e Uashington Post jep dorëheqjen pasi gazeta refuzon të botojë karikaturën që ironizonte pronarin

Një karikaturiste fituese e çmimit Pulitzer ka dhënë dorëheqjen nga Washington Post pasi gazeta refuzoi të botonte një karikaturë satirike të pronarit të saj miliarder Jeff Bezos.

Ann Telnaes, e cila ka punuar për një kohë të gjatë në Washington Post, krijoi një karikaturë të zotit Bezos dhe manjatëve të tjerë të gjunjëzuar para një statuje të Presidentit të zgjedhur Donald Trump.

Ajo tha se refuzimi i gazetës për të botuar karikaturën ishte një “ndryshim i lojës” dhe e përshkroi atë si “të rrezikshëm për një shtyp të lirë”.

Por David Shipley, redaktori i faqes editoriale në gazetë, tha se ai vendosi të mos e botonte karikaturën për të shmangur përsëritjen, jo sepse tallte pronarin e gazetës.

Në karikaturë, Bezos bashkë me Mark Zuckerberg të META-s dhe Sam Altman i OpenAI-t janë përshkruar në gjunjë duke i dhënë çanta me para një statuje të Trump. Mickey Mouse është paraqitur gjithashtu në karikaturë, pasi ABC News – e cila është në pronësi të Disney – muajin e kaluar ra dakord të paguante 15 milionë dollarë për të zgjidhur një padi për shpifje të ngritur nga Trump.

Zonja Telnaes njoftoi dorëheqjen e saj në një postim të premten, duke thënë se ajo kishte punuar për gazetën që nga viti 2008.

“Në gjithë këtë kohë nuk më kanë refuzuar kurrë një karikaturë për shkak të dikujt apo të çfarë kam zgjedhur të drejtoj lapsin tim”, ka shkruar ajo. “Deri tani!”

“Karikatura që u refuzua kritikon miliarderët drejtues të teknologjisë dhe mediave, të cilët kanë bërë çmos për të fituar favoret e Presidentit të zgjedhur Trump.”

Ajo tha se karikatura po satirizonte “këta burra me kontrata qeveritare fitimprurëse dhe me një interes për eliminimin e rregullave të lirisë së medias”.

Por redaktori Shipley i tha BBC-së se vendimi i tij për të mos botuar karikaturën ishte për shkak të përsëritjes së një pjese tjetër që do të publikohej.

“Unë e respektoj Ann Telnaes dhe gjithçka që ajo i ka dhënë The Post. Por nuk pajtohem me interpretimin e saj të ngjarjeve,” tha ai në një deklaratë. “Jo çdo gjykim editorial është një reflektim i një force keqdashëse.”

Ai shtoi: “Vendimi im u udhëhoq nga fakti se sapo kishim botuar një rubrikë me të njëjtën temë si karikatura”.

Muajin e kaluar, Bezos njoftoi se Amazon do të dhuronte 1 milion dollarë për fondin e inaugurimit të Trump.

Bezos e përshkroi gjithashtu fitoren e rizgjedhjes së Trump si “një rikthim të jashtëzakonshëm politik” dhe pas kësaj mori ftesë për darkë në rezidencën e presidentit të zgjedhur në Mar-a-Lago në Florida.

Gazeta u përball me një protestë disa javë përpara zgjedhjeve presidenciale të nëntorit, pasi zoti Bezos ndërhyri për të ndaluar bordin editorial të miratonte politikë mbështetëse për Zëvendës Presidenten Kamala Harris.

Gazeta raportoi se humbi më shumë se 250,000 abonentë pas vendimit.

Los Angeles Times, pronari i së cilës është përshkruar gjithashtu në karikaturën e refuzuar, bëri një lëvizje të ngjashme në tetor dhe tha se gazeta nuk do të publikonte opinione mbështetëse për Harris.

Përktheu DITA