Katër pikë radhazi për EURO 2024 dhe vendi i parë në Grupin E japin rezultat. FIFA ka publikuar renditjen e kombëtareve të futbollit pas përfundimit të dueleve të muajit shtator. Shqipëria bëri shumë mirë, duke marrë katër pikë në dy takimet ndaj Çekisë dhe Polonisë.
Barazimi në Pragë dhe suksesi fantastik në “Air Albania”, kanë sjellë vendin e parë në grupin E të eliminatoreve të Euro 2024 për djemtë e Sylvinhos. Por edhe ngjitjen tri pozicione më lart në renditjen e FIFA-s. Kombëtarja shqiptare renditet në vendin numër 62, me mbi 20 pikë më shumë krahasuar me më parë.
Kuqezinjtë zhvilluan performanca shumë pozitive ndaj dy skuadrave më të forta të grupit. Duke shënuar eurogola dhe duke u afruar gjithnjë e më shumë me kualifikimin në Gjermani 2024.
