“Shpresoj që ky episod t’u mësojë katolikëve që mbështesin Trump-in se të votosh për një narcisist nuk është kurrë një ide e mirë.”
Nëse kreu i Shtëpisë së Bardhë ka humbur edhe George Weigel-in, me sulmin e tij ndaj Papa Leonit duhet vërtet të fillojë të shqetësohet për qëndrueshmërinë e elektoratit të tij në prag të zgjedhjeve të mesmandatit në nëntor.
Kjo sepse studiuesi i lartë i Ethics and Public Policy Center është gjithçka përveçse një liberal i thekur dhe, përkundrazi, duhet të përfaqësojë publikun katolik të interesuar për qëndrimet e Donaldit, të paktën në planin e konservatorizmit social.
Weigel ka qenë biografi i Papa Gjon Palit II, duke jetuar praktikisht në Pallatin Apostolik gjatë përgatitjes së librit të tij “Dëshmitar i Shpresës”. Së bashku me Michael Novak dhe Richard John Neuhaus, ai formonte treshen e intelektualëve amerikanë që përbënin pikën e referimit në Shtetet e Bashkuara për pontifikatin e papës polak dhe më pas të Papa Benediktit XVI.
Qëndrimet u bënë më komplekse me Papa Françeskun. Thjeshtimi është gjithmonë i rrezikshëm, sidomos kur bëhet fjalë për teologjinë, por në këtë rast nuk gabon nëse mendon se, në teori, një presidencë republikane mund të kishte ndërtuar një dialog të frytshëm me këtë pjesë të katolicizmit amerikan, e cila e ka votuar në shumicë, por Donaldi ka arritur ta largojë.
Çfarë menduat kur lexuat mesazhin kundër Papa Leonit të publikuar nga kreu i Shtëpisë së Bardhë?
“Postimet në rrjetin social Truth të presidentit Trump janë të turpshme, skandaloze dhe fyese. Përgjigjja e Papës gjatë fluturimit të tij drejt Afrikës tregon se si duhet të përgjigjet një i rritur ndaj një budallallëku të tillë”.
Kreu i Shtëpisë së Bardhë e pasoi mesazhin me publikimin e një imazhi ku paraqitet si Jezusi, gjë që edhe shumë mbështetës të lëvizjes Maga e kanë konsideruar blasfemi. Çfarë mendoni?
“Çfarë duhet të mendoj? Më duket një gjest që flet vetë”.
Të gjithë pyesin pse Trump-i vendosi të nisë këtë sulm kundër Papës së parë amerikan pikërisht tani dhe shumë dyshojnë se është një përpjekje për të shpërqendruar vëmendjen nga problemet që po has në luftën në Iran. Ju çfarë mendoni se është arsyeja?
“E gjitha kjo ka ndodhur sepse Trump është plotësisht i padisiplinuar dhe nuk ka askënd rreth tij që ta mbrojë nga instinktet e tij më të këqija. Dhe ky është një problem i përgjithshëm që vlen për gjithçka, jo vetëm për mesazhin fyes që ka vendosur të publikojë kundër Papës”.
Ndoshta mendonte se kalimi nga Françesku te Leoni do ta afronte Kishën Katolike me presidencën e tij, nga emigracioni te lufta?
“Siç kam thënë pas zgjedhjes së Prevostit, mendoj se këto ndarje janë ekzagjeruar, veçanërisht nga mediat italiane. Trupi i gjallë i Kishës në Shtetet e Bashkuara është mjaft i ndarë, por ipeshkvijtë janë pothuajse njëzëri të bashkuar. Besimtarët janë të lumtur për emërimin e Leonit, i cili megjithatë ka jetuar pothuajse gjithë jetën e tij të rritur jashtë vendit, mes Amerikës Latine dhe Romës. Nuk është se Chicago ka marrë selinë e Pjetrit, por kjo përvojë ndërkombëtare forcon profilin e tij si Papë, i cili për nga natyra ka një mision global”.
Edhe Papa Gjon Pali II e kishte kundërshtuar pushtimin e Irakut, duke dërguar kardinalin Laghi në Shtëpinë e Bardhë për të bindur Bushin të mos sulmonte, por nuk ishte rënë kurrë kaq poshtë. Çfarë ndikimi do të ketë ky rast në prag të zgjedhjeve të mesmandatit në nëntor?
“Shpresoj që ky episod t’u shërbejë si mësim katolikëve që mbështesin Trump-in, se të votosh për një narcisist nuk është kurrë një ide e mirë. Të gjithë presidentët kanë një ego të fortë, por narcisizmi është një defekt i rëndë për këdo që duhet të drejtojë një vend”.
La Repubblica
