Vritet një person me armë në Kavajë, nën motive të dyshuara gjakmarrjeje. Ky është raportimi paraprak për të shtënat e dëgjuara në qytet. Mësohet se fillimisht objektivi i sulmit pas një sherri në lokal, mbeti i plagosur rëndë dhe më pas humbi jetën. Ngjarja ka ndodhur rreth orës 18:3o të mbrëmjes, në lagjen kryesore, teksa viktima ishte duke pirë kafen në lokal dhe autori i është afruar në befasi, i maskuar me kapele dhe syze sipas të dhënave paraprake, duke qëlluar me disa plumba shënjestrën nga distanca e afërt, teksa po pinte kafen në verandën e subjektit. Sipas ekspertëve, Arjan Gosa mori një oplumb vdekjeprurës në kokë, teksa besohet se i pranishëm në atë moment ka qenë edhe babai i tij.
Paraprakisht bëhet me dije se ka qenë një atentat me qëllime hakmarrjen, pasi viktima është identifikuar si Arjan Gosa, 48 vjeç. Ai rezulton vëllai i Armando (Edmond) Gosës, i cili u përlesh po në lokal me një të ardhur nga Kukësi që jetonte në Kavajë, Sali Rexha, e që gjithashtu mbeti i vrarë, në muajin mars të këtij viti. Gosa e qëlloi me armë në sy të fëmijës, kurse ai iu kundërpërgjigj me thikë. Shkaqet ishin banale, pasi Gosa nuk donte që një “malok” sipas tij të jetonte në Kavajë. Gosa njihej edhe si person problematik dhe me të kaluar kriminale. Rexha jetonte me qira prej muajsh në qytet, bashkë me familjen. Krimi ndodhi më 29 mars, teksa sherri nisi në lokal dhe përfundoi në rrugë.
Autori mbetet ende i paidentifikuar, por besohet se është një killer i paguar që të mos lihej gjurmë, teksa ngjarja është nën hetime aktive policore dhe në vijim. Ekzekutori besohet se mund të jetë ndihmuar në arratisje nga persona të tjerë dhe po analizohen pamjet filmike të kamerave të sigurisë.
Njoftimi i Policisë:
“Më datë 21.05.2023, rreth orës 18.30, në lagjen Nr. 1, në Kavajë, në një lokal, një person ende i paidentifikuar ka vrarë me armë zjarri pistoletë shtetasin A. G. Shërbimet e Policisë pas marrjes së njoftimit kanë shkuar menjëherë në vendngjarje, kanë rrethuar zonën, kanë ngritur pika kontrolli dhe vijon krehja e zonës për të bërë të mundur kapjen e autorit. Grupi hetimor nën drejtimin e Prokurorisë ndodhet në vendngjarje dhe vijon veprimet hetimore për sekuestrimin e provave me qëllim identifikimin dhe kapjen e autorit. Paraprakisht nga të dhënat e grumbulluara dyshohet se ngjarja ka ndodhur për motive hakmarrje”.
