Këngëtarja e njohur Anjeza Shahini, ka reaguar për protestat e fundit në Tiranë. Ajo këshillon Edi Ramën, se është më mirë që të largohet tani, sesa më vonë si diktator.
“Shohim kryeministrin që po pretendon të ndalojë dhunën nëpërmjet dhunës dhe nëpërmjet gjuhës së kërcënimit. Kjo është e pa tolerueshme. Nëse e bën Meloni është po kaq keq. Nëse e bën edhe Franca, akoma më keq.
Unë nuk e fsheh, që kisha krijuar shpresë se do tregoheshe burrë shteti dhe qytetar. Iku edhe kjo shpresë.
Unë shoh revoltë. Shumë revoltë. Përballë nuk po shohim një shtet të organizuar demokratik, por gati një shëmbëlltyrë të një regjimi diktatorial, një polici të paaftë që nuk njeh as të drejtat themelore të njeriut. Shoh një polici që vrapon nëpër rrugica të Tiranës për të rrahur vajza e djem të rinj. Shoh një polici me gjuhë të pisët, që po krijon terror tek çdo qytetar.
Shoh një kryeministër që tenton t’i joshë me para dhe me karizmën e tij të dalë boje, një kryeneç të dështuar. Gjithsesi do largohet. E këshilloj që më mirë të largohet tani si kryeministër i dështuar, se sa më vonë si një diktator.
Shpall zgjedhje dhe lëre popullin që të votojë. Në këtë moment ke ende njerëz që do të të rivotojnë, ke ende një grimcë të magjepsjes që dhurove nëpërmjet atleteve dhe kollareve me ngjyra. Nëse turma është më e vogël se numri i atyre që të votuan, kjo nuk të bën më të fortë por më të përgjegjshëm”, shkruan ajo.
