Një rast kërcënimi me jetë është denoncuar në rrjetet sociale. I tillë është dhe rasti që “Fiks Fare” trajtoi mbrëmjen e së mërkurës, ku një 37-vjeçare shantazhohej në Tik-Tok. Nën emrin e saj shantazhuesit hapnin adresa të ndryshme me foto dhe video të 37-vjeçares dhe familjarëve të saj. Por edhe pse ka bërë kallëzim në polici për çfarë i ka ndodhur, 37-vjeçarja nga Mokra e Pogradecit kërkoi ndihmën e medias. E.H., tha se prej muajit Janar 2023 ka një konflikt me disa persona të cilët pretendojnë se denoncuesja i ka hapur rrjete sociale denigruese. Në këmbim personat e konfliktit, denoncueses i kanë marrë disa foto dhe video nga rrjetet e saj sociale Facebook dhe Instagram dhe më pas i kanë hapur adresa të ndryshme sociale, ku e ofendojnë qytetaren dhe e shantazhojnë.
Ajo tregon se në përdorim ka një faqe Tik-Tok dhe përdor vetëm atë. Aty ka njohur një vajzë e cila përdorte një adresë me foto dhe video të modeleve ruse, ku administratoren e faqes e ka këshilluar të mos përdorte imazhin e të tjerëve, pasi mund të kishte probleme. Pas kësaj denoncueses E.H., i janë hapur disa adresa ku në titull mbajnë emër dhe mbiemër të qytetares të shoqëruara me ofendime. Gjithashtu pak ditë më parë i kanë mbërritur dy video ku një person me emrin E.P., banues në Sarandë, e ka kërcënuar me thikë në dorë dhe me shenja për prerje fyti, për jetën e saj dhe të familjarëve, duke i thënë: “Do të pres kokën dhe do të ngul thikën në fyt! Kokën do ta hedh në liqen!”. Mësohet se policia është vënë në lëvizje dhe ka nisur hetimet për rastin.
