Ndërhyrja e menjëhershme e Policisë së Kurbinit parandalon një ngjarje të mundshme kriminale.
Policia bën me dije se është kapur në flagrancë 48-vjeçari, i cili kërcënoi me armë gjahu, punonjësit e një firme private që po merreshin me shtrimin e një rruge. I arrestuari pretendonte se ky territor ishte pronë e tij. Po sipas burimeve të policisë janë sekuestruar arma e gjahut “Shotgun” dhe municion luftarak.
“Si rezultat i ndërhyrjes së menjëhershme dhe i veprimeve të shpejta operacionale, është kapur në flagrancë dhe është shoqëruar në Komisariat, për kryerjen e veprimeve të mëtejshme procedurale, shtetasi A. D., 48 vjeç, banues në Mamurras.
Në momentin e ndërhyrjes, policia i ka sekuestruar 48-vjeçarit, armën e gjahut “Shotgun” dhe municion luftarak. Nga hetimet paraprake, dyshohet se 48-vjeçari, për shkak se pretendon pronësinë mbi këtë territor, ka kërcënuar me armë gjahu, punonjësit e një firme private, të cilët në kuadër të një projekti të miratuar nga bashkia e Kurbinit, po merreshin me shtrimin e rrugës së guroreve”, thuhet në njoftimin e policisë.
Shërbimet e Komisariatit të Policisë Kurbin, në drejtimin e Prokurorisë, vijojnë veprimet hetimore për dokumentimin e plotë ligjor të këtij rasti.
Materialet procedurale i kaluan Prokurorisë pranë Gjykatës së Rrethit Gjyqësor Kurbin, për veprime të mëtejshme.
p.k\dita
