Gjykata e Elbasanit la në masën ‘arrest me burg’ dy prej tre të arrestuarve për kërcënimin me jetë të biznesmenit Eral Myftaraj, të cilit i kanë kërkuar që të tërhiqej nga gara për tenderin për furnizimin me lëndë drusore nëpër shkollat e Bashkisë së Tiranës, që kapte vlerën 853 mijë euro. Në burg janë lënë Alger Alcani, 27 vjeç dhe Edmir Boçi, 37 vjeç. Masë arresti në mungesë me burg është dhënë për bashkëpunëtorin e katërt, ende në arrati. Ndërsa për të arrestuarin tjetër, biznesmenin Shaqir Alcani, 62 vjeç, është caktuar masa e arrestit shtëpiak, për mungesë të provave bindëse dhe rrethanave. Seanca u mbajt me dyer të mbyllura, ku avokatët e cilësuan ndalimin të paligjshëm.
Tre të dyshuarit akuzohen se kanë kërcënuar me jetë biznesmenin Eral Myftaraj, administrator i firmës “Al-mex”, me qendër në Cërrik, i cili fitoi tenderin publik në Bashkinë e Tiranës, duke ofruar mbi 200 mijë euro më pak nga fondi limit. Pavarësisht kërcënimeve të bëra ndaj tij, Myftaraj ka bërë denoncim në polici, duke mos i tërhequr, edhe pse i thanë se do i vrisnin djalin dhe për pasojë janë arrestuar tre të kallëzuarit.
Në dokumentin e Prokurimit Publik, konstatohet se kanë marrë pjese tre kompanitë “ALCANI sh.p.k”, “REDI PELLET sh.p.k” dhe “AL-MEXWOOD sh.p.k”, ku kjo e fundit u shpall fituese dhe e dyta u skualifikua nga gara. Mësohet se biznesmeni Myftaraj ofroi rreth 565 mijë euro për tenderin. Shaqir Alcani, me të birin dhe mikun e tyre, akuzohen për “shtrëngim me anë të kanosjes”, e kryer në bashkëpunim. Një person i katërt është ende në kërkim si bashkëpunëtor. Në cilësinë e provës materiale janë sekuestruar makina dhe 8 aparate celulare.
