Policia e Krujës bën me dije se ka kapur dhe vënë në pranga një shtetas, i cili ishte i shpallur në kërkim për dhënie ndihmë për kalim të paligjshëm të kufirit dhe për mosbindje ndaj urdhrit të punonjësit të Policisë.
Bazuar në informacionet e siguruara nga inteligjenca informative, për vendndodhjen e një shtetasi në kërkim, Shërbimet e Komisariatit të Policisë Krujë, kanë organizuar menjëherë punën për kapjen e tij.
“Në një lokal në Fushë Krujë, shërbimet e Komisariatit të Policisë Krujë kanë lokalizuar dhe ndaluar shtetasin F. Rr., 40 vjeç, banues në Dukagjin, Krujë, të cilit Gjykata e Rrethit Gjyqësor Shkodër i ka caktuar masën e sigurisë “Arrest në burg”, për veprat penale “Dhënia ndihmë për kalim të paligjshëm të kufirit” dhe “Mosbindja ndaj urdhrit të punonjësit të policisë së rendit publik”, bën me dije policia.
40-vjeçari, më datë 30 korrik të vitit ka qenë duke transportuar shtetas nga vendet e treta, me një automjet tip “Ford”. Pasi është konstatuar nga punonjësit e Policisë, në hyrje të qytetit të Shkodrës, ai nuk i është bindur urdhrave të tyre për të ndaluar, por është larguar dhe më pas ka braktisur automjetin.
Shtetasi F. Rr. iu dorëzua DVP Shkodër, për veprime të mëtejshme procedurale.
p.k\dita