Rreth shtatë persona që kishin kërkuar azil në Britaninë e Madhe do të dërgoheshin në Ruandë, por ndërhyrja e Gjykatës Evropiane të të Drejtave të Njeriut e ndaloi fluturimin e tyre. Gjithcka u ndalua rreth një orë e gjysmë para se të niseshin për në Afrikën Lindore pas kërkesës së azilkërkuesve që nisën me urgjencë sfidat ligjore.
26-vjeçari shqiptar është një nga shtatë azilkërkuesit që kanë nisur sfidat ligjore të minutës së fundit për të shmangur fluturimin me forcë në vendin e Afrikës Lindore. Të tjerë janë iranianë, azilkërkues irakian dhe vietnamez. Të gjithë mbërritën në Britani me varka të vogla në mes të majit.
“Në Shqipëri jam shfrytëzuar nga trafikantët për gjashtë muaj. Më trafikuan në Francë. Nuk e dija se në cilin vend po më çonin”, tha shqiptari. Kur hipën në varkë në Francën Veriore, menduan se do të shkonin në Britani, nuk kishin dëgjuar asgjë për Ruandën.
“Jam në një gjendje shumë të keqe mendore. Nuk kam qenë kurrë në Afrikë dhe nuk mendoj se do të jetë e sigurt për mua. Nuk mund të kthehem në Shqipëri se do të më vrasin trafikantët atje. I vetmi vend i sigurt për mua është Britania. Si mund të dërgojnë një shqiptar në Afrikë?”, tha shqiptari, i cili kishte menduar të kryente aktin ekstrem të vetëvrasjes në vend që të hipte në aeroplan për të shkuar në Ruandë.
Viktimat e dyshuara të trafikimit supozohet se do të hetohen plotësisht para se të largohen nga Britania. Vendimi për ndalimin e fluturimit është një goditje për Boris Johnson dhe sekretaren e tij të brendshme, Priti Patel, të cilët kishin premtuar se do të fillonin në maj dërgimin e mijëra azilkërkuesve në Afrikën Lindore.
Duke iu përgjigjur vendimit, Patel tha se ishte “e zhgënjyer” nga sfida ligjore, bëri kritika të forta ndaj vendimit të GJEDNJ dhe tha do të vazhdojnë me procedurat e tyre. “Ne nuk do të pengohemi të bëjmë gjënë e duhur dhe të zbatojmë planet tona për të kontrolluar kufijtë e vendit tonë,” tha ajo. Qeveria e Ruandës tha se ishte ende e angazhuar për pranimin e azilkërkuesve të dërguar nga Mbretëria e Bashkuar.
Fluturimi, kushtoi rreth 500 mijë paund dhe ishte paguar nga qeveria britanike, thotë një burim për The Guardian por qeveria britanike nuk e pranon këtë gjë. Të hënën, 138 persona arritën në Mbretërinë e Bashkuar me tre varka, ndërsa më shumë se 200 mbërritën të martën, me më shumë se 10,000 emigrantë të regjistruar që kanë bërë udhëtimin deri tani këtë vit.
a.m/dita
