Gjykata kundër Krimit të Organizuar dhe Korrupsionit ka rrëzuar kërkesën e Ilir Metës, i cili një ditë më parë përmes avokatit të tij kërkoi shuarjen e masës së sigurisë arrest me burg.
Në dokument e depozituar diten e djeshme thuhej se kërkuesi synon të rrëzojë vendimet e mëparshme të GJKKO-së, përkatësisht nr. 125 dhe nr. 130 të tetorit 2024, si dhe vendimin nr. 59 të nëntorit 2024 të Gjykatës së Apelit të Posaçëm.
Në kërkesë përmendet se ndaj Ilir Metes është ngritur procedim penal pas kallëzimit të shtetasit Romeo Kara, i cili ka depozituar një padi në Prokurorinë e Posaçme duke përmendur emra të tjerë si Sali Berisha, Kastriot Ismailaj, Tomas Pleshkash dhe Bujar Nepravishta, për akte të dyshuara korruptive të lidhura me çështjen DIA–ÇEZ Shpërndarje, që daton që nga shtatori i vitit 2010.
Në materialin e dorëzuar në gjykatë, thuhet gjithashtu se Romeo Kara ka deklaruar se gjatë përfaqësimit të tij ligjor në procesin e arbitrazhit në Vjenë lidhur me çështjen e OSHEE-së, është njohur me informacione që lidhen me hetimin aktual.
Meta dhe Kryemadhi dërgohen për gjykim
Më 29 gusht SPAK përfundoi hetimet ndaj ish-presidentit Ilir Meta dhe ish-bashkëshortes së tij, Monika Kryemadhi për akuzat e korrupsionit, pastrimit të parave dhe fshehjes së pasurisë, si dhe dërgimin e çështjes në gjykatë për t’iu nënshtruar vlerësimit në seancë paraprake. Po ashtu, janë dërguar për gjykim si të bashkëpandehur dhe Fatime Kryemadhi, nëna e Monika Kryemadhit, ish-kreu i AKEP, Pirro Xhixho dhe Ema Çoku, një finacuese e LSI-së.
SPAK e akuzon Metën për ndikime korruptive për episode që lidhen me çështjen CEZ-DIA, në një marrëveshje interkoneksioni, si dhe për një marrëdhënie të dyshuar korruptive për ndryshimin e një ligji në favor të biznesmenit Samir Mane. Sipas SPAK, akuza të ngjashme rëndojnë edhe mbi Monika Kryemadhin. Meta dhe Kryemadhi i mohojnë akuzat.
j.l./ dita
