Kryeministrja e Serbisë Ana Brnabiç i ka përcjellë Kuvendit të Serbisë propozimin për shkarkimin e ministrit të Ekonomisë, Rade Basta.
Sipas Bastas, Brnabiç i ka komunikuar se kjo ishte një kërkesë e liderëve të koalicionit të Partisë Socialiste Serbi-Serbia e Bashkuar.
Megjithatë ministri thotë se shkarkimi i tij kërkohet për shkak se ai ka kërkuar që Serbia të vendosë sanksione ndaj Rusisë.
Kërkesa për shkarkimin e tij do të debatohet në Kuvend, ndërsa Basta tha se nuk pret që Partia Progresive Serbe në pushtet ta mbështesë këtë kërkesë.
Ai ka shpjeguar se tashmë ka thënë gjithçka që ka për të thënë për ish-bashkëpunëtorët e tij politikë.
“Nuk kam ndërmend të futem në baltën e tyre të përditshme politike”, tha Basta në një deklaratë.
Ai theksoi se gjithmonë ka punuar në interes të qytetarëve serbë, duke shtuar se do të vazhdojë ta bëjë këtë me lëvizjen e tij Rruga Evropiane e Serbisë.
“Me ndryshimet tektonike që po ndodhin në hartën gjeopolitike botërore, Serbia nuk mund të mbetet një ishull i vetmuar. Rruga jonë e vetme, jam i bindur plotësisht, është drejt Bashkimit Evropian dhe vlerave perëndimore, mbi të gjitha shtetit të së drejtës dhe forcimit të institucioneve. Koha, si e vetmja masë adekuate, do të tregojë, si gjithmonë, idetë, programet dhe qëndrimet e kujt janë të sakta”, tha ministri i Ekonomisë.
o.j/dita
