Policia bën me dije se po vijon me kontrolle të befasishme për identifikimin dhe arrestimin e shtetasve që mbajnë armë, pa leje.
Si rezultat i këtyre kontrolleve është goditur një rast në fushën e armëmbajtjes pa leje në qytetin e Vlorës, për të cilën është vënë në pranga një 61 vjeçar.
“Shërbimet e Komisariatit të Policisë Vlorë, në vijim të punës për parandalimin dhe goditjen e veprimtarisë kriminale në fushën e armëmbajtjes pa leje, bazuar dhe në informacionet e siguruara në rrugë operative se një shtetas mbante të fshehur në magazinën e tij, në lagjen “Bashkimi”, armë zjarri dhe municion luftarak, kanë organizuar dhe finalizuar operacionin policor të koduar “Strike 4″, në kuadër të të cilit u bë arrestimi në flagrancë i shtetasit: -V. A., 61 vjeç, banues në lagjen “Left Sallata”, bën me dije policia. Arma e zjarrit dhe municioni luftarak, së bashku me mjetin prerës thikë, u sekuestruan në cilësinë e provës materiale”, sqaron policia.
Nga verifikimet ka rezultuar se 61-vjeçari është babai i njërit prej shtetasve të arrestuar më parë nga Policia e Vlorës, në kuadër të operacionit policor të koduar “Obelisk”, si rezultat i të cilit u parandalua një ngjarje e mundshme kriminale kundër personit, e cila do të kryhej me armë zjarri.
Vijojnë veprimet hetimore për dokumentimin e plotë të veprimtarive kriminale të shtetasit V. A.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
p.k\dita
