Ekspertët e konsultuar nga gazeta britanike “The Guardian” kanë paralajmëruar se në njëzet vjet do të jetë e pamundur të shihen shumica e yjeve në qiell.
Kjo shkallë e ndriçimit të qiellit do të thotë që nëse një fëmijë lind tani në një vend ku shihen 250 yje gjatë natës, në kohën kur ai të mbushë 18 vjeç, do të jetë në gjendje të shohë vetëm më pak se gjysmën, rreth 100 (si në foton më poshtë).
Sipas tyre, përdorimi pa kriter dhe i pakufizuar i ndriçimit të jashtëm, ndriçimit publik, veçanërisht i reklamave dhe ambienteve sportive, mund ta bëjë Rrugën e Qumështit dhe pothuajse çdo yll, krejtësisht të padukshëm në njëzet vjet, nëse ritmi vazhdon si sot.
Astronomi Martin Rees është pjesë e një grupi që mbron qiejt e errët të Britanisë. Ai ka prodhuar një raport që përshkruan një sërë masash për të zbutur “ndotjen nga drita”. Këto masa përcaktojnë përdorimin, intensitetin dhe drejtimin e dritës artificiale.
Si përmbledhje, kërkohet që ndriçimi të ndizet vetëm nga poshtë, jo anash ose lart, dhe që ndriçimi publik të përdoret vetëm kur kjo të jetë rreptësisht e nevojshme.
Ky është një problem që po avancon i shfrenuar në të gjithë Evropën. “Nuk bëhet fjalë për të mos ndriçuar, por për të ndriçuar mirë”, është motoja kryesore.
Sipas një studimi të botuar nga Cristopher Kyba i Qendrës Gjermane për Gjeoshkencat, ndriçimi artificial rritet me rreth 10% çdo vit.
a.q. / dita
