Zhdukja e Leonard Thodhorit e Fatmir Sulovarit nga Saranda, vijon të jetë e pazbardhur, 1 muaj e gjysmë pas ngjarjes së rëndë, ndërsa banorët janë të shokuar e familjarët kërkojnë drejtësi.
Sipas dosjes hetimore të siguruar, zhdukja e dy personave ka ndodhur rreth orës 15.19 të 6 prillit, dhe është denoncuar nga familjarët në 9 prill, kurse me komunikatë nga policia është publikuar në 12 prill, vetëm pasi lajmi ishte bërë publik në media.
Ndërkohë kërkimet për trupat e dy të zhdukurve kanë nisur në 23 prill.
4 data të ndryshme për të njëjtën ngjarje, ndoshta shkak që sot ende nuk po gjenden trupat.
Në vendimin për caktimin e masës së sigurisë ndaj shtetasit S. B, por edhe nga dëshmia në media e një prej personave që mund të ketë dijeni mbi ngjarjen, flitet për përdorim të kokainës dhe tregtim të saj.
Sipas fjalëve të tij “ditën e enjte në darkë e ka telefonuar F. nga numri i L. dhe i ka thënë “Do na sjellësh mall këtu?”, “Se e do Y.” apo “vajtëm tek shtëpia e K. pastaj. Ja ta them copë unë, pinim kokainë…pimë e morëm prapë…”
Sipas materialit policor, rezulton se Leonard Thodhori lëviztë i armatosur me pistoletë në Sarandë dhe po i armatosur ka lëvizur edhe në aksin Sarandë – Kardhiq.
Dosja e zhdukjes së dy personave ka nxjerrë në skenë problemin e pronave pa dokumentacion në Sarandë, çka ka çuar shpesh në konflikte.
Edhe pas 33 vitesh, zona si Çuka rezultojnë ende të paazhornuara në ASHK dhe tokat aty janë pa certifikatë pronësie. Një të tillë e pretendonte edhe Leonard Thodhori, e kjo tokë mendohet si pikënisje e konfliktit.
Nga ana tjetër Fatmir Sulovari rezulton ish-pronar i një diskoje në Ksamil, për te cilën familjarët e tij thonë se është prishur nga shteti për shkak se toka aty dhe rreth saj është dhënë për investim strategjik nga qeveria.
Dokumenti për caktimin e masës së sigurisë ndaj shtetasit S. B, zbulon edhe se si një automjet qarkullon ditën me dy palë targa të falsifikuara. Konkretisht mjeti tip “Mercedes-Benz” E Class që mendohet se ka rrëmbyer dy të zhdukurit, brenda harkut kohor të 39 minuta shihet të qarkullojë njëherë me targat AA175LV të vjedhura në Shqipëri e njëherë më targat YTO1114 të vjedhura në Greqi.
Nga ana tjetër mjeti tip “Land Rover” i sekuestruar në një karburant në Sarandë, rezulton të ketë qarkulluar në Sarandë me xhama të zinj por edhe me fenelinë policie e cila nuk u gjet në momentin e sekuestrimit.
Po ashtu nga dosja hetimore zbulohet edhe fakti se si në Sarandë mund të marrësh një pronë me qira duke realizuar kontrata fiktive. Një jurist i marrë në pyetje lidhur me kontratën e vilës ku u zbulua mjeti i krimit, gjatë deklarimit të tij, pasqyruar në faqen nr.9 të vendimit për caktimin e masës së sigurisë, është shprehur: “Nuk mund të jap shpjegime pasi nuk e di për çfarë kontratë bëhet fjalë sepse redaktoj shumë kontrata”.
Zhdukja e dy personave zbuloi gjithashtu edhe një automjet të blinduar, tashmë i sekuestruar. Ai u gjend i parkuar në një plantacion mandarinash në fshatin Xarrë. Bëhet fjalë për një Jeep Cherokee i zi me targa greke BOO – 9195 me xhama të zinj.
m.b/dita
