Biznesmeni Ilir Rrapaj , i arrestuar për çështjen e sterilizimit nga Prokuroria e Posaçme, ka ankimuar masën e arrestit me burg nëpërmjet avokatit mbrojtës të tij, duke kërkuar lirimin në Gjykatën e Posaçme të Apelit.
Nëpërmjet avokatit të tij mbrojtës, Ardjan Kalia, pronari i shumicës së aksioneve të “Sani Service”, ka kërkuar masë më të butë sigurie, me argumentin se nuk përbën rrezikshmëri shoqërore apo që të prishë hetimet.
Biznesmeni Rrapaj u ndalua më 16 gusht, bashkë me ish-zv/ministrin e Shëndetësisë, Klodian Rrjepaj, teksa akuzohet për mashtrim me pasoja të rënda, me koncesionin e sterilizimit, bashkë me 4 zyrtarë dhe ish-zyrtarë të tjerë.
Sipas SPAK, Rrapaj i ka kryer këto vepra penale fillimisht në studimin e fizibilititeteti për koston e shërbimit, si dhe kur ka fshehur njohjen dhe konfliktin e interesit që ka pasur me zyrtarët e Ministrisë së Shëndetësisë, kur ka aplikuar për koncesionin e sterilizimit.
Për abuzimet me këtë koncesion, i cili u denoncua tre vite më parë nga “Nisma Thurje”, në pranga ka rënë edhe ish-zv/ministri i Shëndetësisë Klodian Rjepaj, i cili po ashtu pritet të dorëzojë të njëjtën kërkesë, për lirimin e tij në një masë tjetër të zbutur.
Gjatë verifikimit te masës së sigurisë ne Gjykatën e Posaçme, avokatja mbrojtëse e Klodian Rjepajt afroi edhe garanci pasurore kundrejt lirimit të tij, po kjo kërkesë nuk u pranua, pas këmbënguljes edhe të SPAK.
Për koncesionin dhjetëvjeçar me vlerë 100 mln euro, me masë sigurie janë edhe 6 persona të tjerë, të cilët akuzohen për shpërdorim detyre dhe falsifikim. Në lidhje me këtë koncesion, është duke u hetuar edhe ish-ministri e Shëndetësisë, Ilir Beqaj dhe ish-ministri i Financave Shkëlqim Cani.
SPAK e ka ende çështjen në proces dhe po kryen hetime të thelluara, me kontrolle, verifikime dhe marrje në pyetje.
